ԵՐԵՎԱՆ, ԴԵԿՏԵՄԲԵՐԻ 10, 24News
Fly One Armenia ազգային բյուջետային ավիաընկերությունը հերթական օդանավն է շահագործման հանձնել, որը սպասարկելու է եվրոպական և մերձավոր արևելյան թռիչքային ուղղությունները: «Արմենպրես»-ի հետ զրույցում այս մասին հայտնեց Fly One Armenia ավիաընկերության խորհրդի նախագահ Արամ Անանյանը: Օդանավն Airbus A320 դասի է, 180 տեղանոց: Դեկտեմբերի 9-ին այն կատարել է առաջին թռիչքը:
«Մեր ուղևորներին խոստացել էինք, որ ընդլայնելու ենք թռիչքային ցանցը և օդանավային պարկը, և այդ խոստումն ի կատար ենք ածում: Առաջիկայում ևս նախատեսում ենք օդանավային պարկի տեսանելի ավելացում, նաև՝ աշխարհագրության ընդլայնում»,- ասաց Անանյանը:
Fly One Armenia ավիաընկերության խորհրդի նախագահը նշեց, որ առաջիկա օրերին մեկնարկելու են Երևան-Բեյրութ-Երևան, Երևան-Միլան-Երևան, Երևան-Թել Ավիվ- Երևան, Երևան-Դուբայ-Երևան երթուղով չվերթերը:
Օրեր առաջ Fly One Armenia-ն նաև հայտարարել էր «Բացահայտիր աշխարհը» աննախադեպ ակցիայի մեկնարկի մասին: Ակցիայի շրջանակներում բոլոր ցանկացողները հնարավորություն ունեն ձեռք բերել տոմսեր առավելագույն մատչելի գներով: Այս տարի Flyone Armenia ընկերության կողմից ակցիային ներկայացվում են դեպի Մերձավոր Արևելքի քաղաքներ իրականացվելիք չվերթերը։
«Ակցիայի առաջին արդյունքները բավականին տպավորիչ էին, ավիաընկերությունն առաջիկայում ևս նախատեսում է ուրախացնել իր ուղևորներին՝ տալով հասանելի գներով աշխարհը ճանաչելու և բացահայտելու հնարավորություն», -ընդգծեց Անանյանը:
Ավիաընկերության նոր նախաձեռնություններն այսքանով չեն սահմանափակվում: Անանյանը հայտնեց, որ ավիաընկերությունը պատրաստվում է հայտարարել զբոսաշրջության ոլորտում նորարական ծրագրերի մասին:
«Այստեղ նույնպես ուղևորների համար կան բացահայտումներ, անակնկալներ և նոր ուղղություններ, ուղևորներին հնարավորություն կընձեռվի ճամփորդելու Ամանորի և Սուրբ ծննդյան տոներին ընդառաջ»,- տեղեկացրեց Անանյանը:
Fly One Armenia ավիաընկերության խորհրդի նախագահի խոսքով՝ իրենց ավիաընկերությունը շարունակում է պահպանել առաջատար դիրքը Հայաստանի ավիափոխադրումների ոլորտում:
«Ընդլայնված աշխարհագրությամբ ենք ամփոփելու դեկտեմբերը՝ կատարելով թռիչքներ Մոսկվա, Սանկտ Պետերբուրգ, Եկատերինբուրգ, Սոչի, Միներալնիե Վոդի, Թբիլիսի, Ստամբուլ, Քիշնև, Փարիզ, Լիոն, Միլան, Դուբայ, Բեյրութ և Թել Ավիվ ուղղություններով»,- եզրափակեց Անանյանը:
«FlyOne Armenia» ավիաընկերությունը 2021 թվականի նոյեմբերի 12-ին և 15-ին ստացել է Ավիացիայի միջազգային կազմակերպության (ICAO) և Օդային տրանսպորտի միջազգային ասոցիացիայի (IATA) նույնականացման ծածկագրերը:
--00--ԶՀ