ԵՐԵՎԱՆ, ԴԵԿՏԵՄԲԵՐԻ 14, 24News
ԱՄՆ ներկայացուցիչների պալատը դեկտեմբերի 13-ին 221 կողմ 212 դեմ ձայների հարաբերակցությամբ լիազորել է երկրի նախագահ Ջո Բայդենի նկատմամբ իմփիչմենթի հետաքննություն սկսել։ Այս մասին հաղորդում է «Արմենպրես»-ը՝ վկայակոչելով Associated Press գործակալության հրապարակումը։
Այսպիսով, Ներկայացուցիչների պալատի բոլոր հանրապետական անդամները կողմ են քվեարկել իմփիչմենթի հետաքննությանը, որը կարող է հանգեցնել նախագահի հեռացմանը պաշտոնից, եթե Սենատում կայացած դատավարության ժամանակ նրան մեղավոր ճանաչեն։
Հետաքննությունը կենտրոնացած է Բայդենի և նրա ընտանիքի անդամների, մասնավորապես՝ նրա որդի Հանթեր Բայդենի գործարար կապերի շուրջ։ Ըստ հանրապետական կոնգրեսականների՝ Բայդենի փոխնախագահության տարիներին նրա որդին արտերկրում, այդ թվում՝ Չինաստանում բիզնեսներից հսկայական եկամուտներ է ստացել, իսկ Ջո Բայդենն, իբրև, բազմաթիվ շփումներ է ունեցել իր ընտանիքի օտարերկրյա գործընկերների հետ։
Չնայած բազմաթիվ լրատվամիջոցներ գրում են, որ կոնգրեսականները դեռ պետք է ապացույցներ ներկայացնեն, սակայն Ներկայացուցիչների պալատի խոսնակ Մայք Ջոնսոնը X սոցիալական հարթակի իր էջում գրել է, որ նման ապացույցներ առկա են։
«Մենք տեսել ենք վկաների ցուցմունքներ և բանկային փաստաթղթեր, որոնք ցույց են տալիս, որ օտարերկրյա հակառակորդներից միլիոնավոր դոլարներ են հոսել Բայդենների ընտանիք: Վկաները ցուցմունքներ են տվել Նախագահի բազմաթիվ շփումների մասին իր ընտանիքի օտարերկրյա հաճախորդների հետ», - գրել է Ջոնսոնը։
Ներկայացուցիչների պալատի դեմոկրատները պնդում են, որ Բայդենի նկատմամբ հետաքննությունը նախաձեռնվել է՝ որպես վրեժ նախկին նախագահ Դոնալդ Թրամփի նկատմամբ իմփիչմենթի երկու հետաքննությունների համար։
--00--ԼՀ