ԵՐԵՎԱՆ, ՍԵՊՏԵՄԲԵՐԻ 14, 24News
«Արցախի անվտանգության և զարգացման ճակատ» հանրային շարժումը հայտարարություն է տարածել, որում ասվում է․
«Այսօր կարելի է փաստել, որ Ադրբեջանը հերթական անգամ մերժել է հաստատված համաձայնագրերը և ի պատասխան Արցախի իշխանությունների համաձայնության՝ Ռուսաստանից Կարմիր խաչի մարդասիրական բեռների տեղափոխման մասին Ակնա-Ստեփանակերտ ճանապարհով, թույլ չի տվել ներմուծել մարդասիրական բեռներ Հայաստանի Հանրապետության տարածքից Բերձորի միջանցքով։
Ադրբեջանի իշխանությունների այս պահվածքը ոչ այլ ինչ է, քան հիմնախնդրի լուծման միջազգային դերակատարների բոլոր ջանքերի լիակատար արհամարհում։
Առնվազն տարակուսելի է, որ Ռուսաստանը՝ որպես համաձայնագրերի կողմ և 2020 թվականի եռակողմ հայտարարության դրույթների կատարման երաշխավոր, հերթական սադրանքն է կրում Ադրբեջանի կողմից։
Սա առաջին անգամը չէ, որ «Արցախի անվտանգության և զարգացման ճակատ» հասարակական շարժումը հայտարարում է ձեռք բերված պայմանավորվածությունները կատարելու ադրբեջանական կողմի կասկածելի կարողության մասին և կոչ է անում Արցախի իշխանություններին պնդել միջազգային երաշխիքների և պատժի անհրաժեշտությունը։
Այս դժվարին ժամին մեր հայրենակիցներին կոչ ենք անում համախմբվել և անել հնարավորը Արցախը փրկելու համար։ Ամբողջական շրջափակման, խոր հումանիտար ճգնաժամի և Ադրբեջանի կողմից գոյատևման սպառնալիքների պայմաններում Արցախի հայության պահպանման կարևորագույն գրավականը եղել և մնում է արցախցիների անսասան ցանկությունը՝ ապրելու իր հայրենիքում և պաշտպանելու այն ժ. ցանկացած գնով»:
--00—ԼՀ