ԵՐԵՎԱՆ, ՄԱՅԻՍԻ 25, 24News
Մոսկվայում ակնկալում են, որ Ռուսաստանի, Հայաստանի և Ադրբեջանի ղեկավարների՝ այսօր կայանալիք բանակցությունների արդյունքում առնվազն երկու եռակողմ փաստաթուղթ կստորագրվի։ Այս մասին գրում է «Կոմերսանտ»-ը՝ հղում անելով իր դիվանագիտական աղբյուրներին։
Պարբերականի տեղեկություններով՝ փաստաթղթերից մեկը Վլադիմիր Պուտինի, Իլհամ Ալիևի և Նիկոլ Փաշինյանի՝ 2020 թվականի նոյեմբերից ի վեր հինգերորդ եռակողմ հայտարարությունն է լինելու, երկրորդ փաստաթուղթն էլ վերաբերելու է Հարավային Կովկասում տրանսպորտային ուղիների ապաշրջափակմանը։
«Մայիսի 23-ին Մոսկվայում կայացավ Ադրբեջանի, Հայաստանի և Ռուսաստանի փոխվարչապետներ Շահին Մուստաֆաևի, Մհեր Գրիգորյանի և Ալեքսեյ Օվերչուկի գլխավորությամբ գործող եռակողմ աշխատանքային խմբի հանդիպումը, որը տարածաշրջանի տնտեսական և տրանսպորտային ուղիների ապաշրջափակումը մեռյալ կետից շարժելու հերթական փորձը ձեռնարկեց», - գրում է «Կոմերսանտ»-ը։
«Կոմերսանտ»-ը տեղեկացնում է, որ վերջին երկու օրերին հայկական, ռուսական և ադրբեջանական պատվիրակությունները ներգրավված էին ակտիվ բանակցություններում։
Փաստաթղթերից մեկը, որ վերաբերում էր հաղորդակցության ուղիների ապաշրջափակմանը, նախապատրաստում էին փոխվարչապետները։ Երկրորդ փաստաթուղթը՝ Ալիևի, Փաշինյանի և Պուտինի հինգերորդ համատեղ հայտարարությունը, վերջնական տեսքի էին բերում երեք երկրների արտաքին քաղաքական գերատեսչությունները», - գրում է պարբերականը։
--00—ԶՀ