ԵՐԵՎԱՆ, ՄԱՅԻՍԻ 2, 24News
Օ-դը-Ֆրանսի շրջանային խորհուրդը սատարում է Արցախի ժողովրդի իրավունքների և մասնավորապես, ինքնորոշման իրավունքի լիակատար իրացմանը:
«Արմենպրես»-ի հաղորդմամբ՝ Երևանում Արցախի ներկայացուցչությունում այս մասին համատեղ հայտարարություն ստորագրեցին Օ դը Ֆրանսի շրջանային խորհրդի նախագահ Քզավիե Բերտրանը և Արցախի ԱԳ նախարար Սերգեյ Ղազարյանը:
Ֆրանսիայից ժամանած պաշտոնյաները միջազգային հանրությանը կոչ են անում պատժամիջոցներ կիրառել Ադրբեջանի վարչակարգի դեմ, քանի դեռ Բաքուն հրաժարվում է կատարել Լաչինի միջանցքով մարդկանց և բեռների երկկողմ տեղաշարժ ապահովելու ՄԱԿ արդարադատության միջազգային դատարանի որոշումը:
Հանդիպման ընթացքում Քզավիե Բերտրանը ընդգծեց, որ Ադրբեջանի սանձազերծած ագրեսիան և այլ գործողություններն անընդունելի են և պետք է դադարեցվեն:
«Որևէ մեկն իրավունք չունի անցակետ դնել, միջանցք փակել, խոչընդոտել հարյուրավոր մարդկանց բուժում ստանալուն, երեխաներին զրկել կրթության հնարավորությունից, արգելափակել գազի և էլեկտրաէներգիայի մատակարարարումը: Ադրբեջանին որևէ մեկը նման իրավունք չի տվել: Ֆրանսիա վերադառնալուց հետո պետք է բարձրաձայնեմ այս մասին»,- ասաց նա:
Ըստ համատեղ հայտարարության՝ Ադրբեջանի վարչակարգը ինչպես իր իսկ քաղաքացիների ճնշման գործելակերպով, այնպես էլ Հայաստանի և Արցախի հանդեպ ռազմական ծավալապաշտությամբ, կարող է միայն պատերազմի, ավերածությունների, թշվառության և հուսահատության հանգեցնել։
--00—ԶՀ