ԵՐԵՎԱՆ, ԱՊՐԻԼԻ 20, Times․am:
«Մենք բոլոր ճշմարտությունները դրել ենք սեղանին», - ապրիլի 20-ին խորհրդարանում ուսանողների հետ հանդիպման ժամանակ ասել է «Քաղաքացիական պայմանագիր» խմբակցության քարտուղար Արթուր Հովհաննիսյանը։
Հանդիպմանը ներկա ԵՊՀ-ի, ՊԿԱ-ի եւ Հայ-ռուսական համալսարանի ուսանողները փորձաշրջան են անցնում օրենսդիր մարմնում:
Ուսանողների հարցերը, մասնավորապես, վերաբերել են Արցախի շուրջ ծավալվող իրադարձություններին, հայ-ադրբեջանական բանակցություններին, իշխանություն-ընդիմություն խորհրդարանական փոխհարաբերություններին, սփյուռքի հետ հարաբերություններին:
Արթուր Հովհաննիսյանը նշել է, որ ընդդիմության հետ հարաբերությունները խորհրդարանում բարդ են: Իշխանության կողմից եղել են առաջարկներ հանդիպել եւ քննարկել բոլոր նրբությունները, որոնք կապված են այս պահին արտաքին քաղաքական իրավիճակի հետ, սակայն նրանք որդեգրել են փողոցային պայքարի ճանապարհը` չունենալով օրակարգ:
Խոսելով բանակցությունների մասին` պատգամավորը նշել է, որ առաջնայինը Հայաստանի Հանրապետության անվտանգությունն է, մեր սուվերեն տարածքի անձեռնմխելիությունը եւ, իհարկե, արցախահայության իրավունքներն ու ազատությունները, որոնցից կբխի Արցախի կարգավիճակը: Նրա խոսքով` մինչեւ 2018թ. բանակցություններ եղել են, բայց դրանք մտել են փակուղի:
Պատգամավորը հույս է հայտնել, որ ապագա սերունդները ստիպված չեն լինի անդրադառնալ Արցախի հարցին:
--00--ԿԿ