ԵՐԵՎԱՆ, ՆՈՅԵՄԲԵՐԻ 7, 24News
«Սքայ Ագրո» ընկերությունը Հայաստանում առաջինն է, որ գյուղատնտեսության մեջ կիրառում է գյուղատնտեսական անօդաչու թռչող սարքեր՝ ագրոդրոններ։
Ավանդական սրսկման համեմատ բուժանյութն ագրոդրոնի առաջացրած քամու օգնությամբ փոշու տեսքով «նստում» է մշակաբույսերի ճյուղերին և կարողանում հասնել անգամ ամենախիտ հատվածներին։ Այս մեթոդն արդյունավետ է, խնայում է ժամանակը և ճշգրիտ է՝ բուժանյութը ճիշտ չափաբաժնով տարածելու համար։
«Սքայ Ագրոյի» գործընկերն Ակբա Ֆեդերացիան է, որը Հայաստանում խթանում է նորարարական գյուղատնտեսության զարգացումն ու ոլորտը երիտասարդների համար դարձնում գրավիչ։
«Ագրոդրոնների օգտագործումը, ի տարբերություն տրակտորների, բերքը չի տրորում։ Մենք մանրածավալային սրսկում ենք իրականացնում. մոտ 15 րոպեում 1,5 հեկտար տարածք կարող ենք մշակել, պարարտացնել։ Սարքը շատ փոքր կաթիլներով է սրսկում, ինչը գործընթացի էֆեկտիվությունը մեծացնում է շուրջ 25%-ով ու հնարավորություն տալիս բուժապարարտանյութերի խնայողություն իրականցնել։ Հայաստանի համար այս տեխնոլոգիան շատ լավն է, քանի որ մեր ռելիեֆը հնարավորություն է տալիս այս սարքերն իդեալական աշխատեցնել։
Ակբա Ֆեդերացիայի հետ անցյալ տարի սկսեցինք աշխատել. «ֆելոուշիփի» ծրագիր էր սկսնակ ձեռներեցների համար։ Մենք մի քանի կարևոր ծրագրեր ենք սկսել իրականացնել, փորձում ենք գյուղատնտեսությունն ավարտական դասարանների երեխաների համար գրավիչ դարձնել: Ակբա Ֆեդերացիան մեր գործըկերներից մեկն է, որի հետ միասին մենք այս ամենն իրականացնում ենք»,- նշել է «Սքայ Ագրո» ընկերության համահիմնադիր Միհրան Սահակյանը։
«Սքայ Ագրոյի» թիմը Հայաստանում զարգացնում է ճշգրիտ գյուղատնտեսություն, որը կօգնի ֆերմերներին շատ բերք և եկամուտ ստանալ՝ մինիմալ բուժապարարտանյութեր օգտագործելով։
Ակբա Ֆեդերացիան Ակբա բանկի միակ նշանակալից մասնակիցն է, բանկի բաժնետոմսերում ունի ավելի քան 81 տոկոս մասնաբաժին: Ակբա բանկում ունեցած մասնակցության շնորհիվ Ակբա Ֆեդերացիան նպաստում է Հայաստանի ողջ տարածքում գյուղատնտեսության, գյուղական շրջաններում փոքր և միջին բիզնեսի զարգացմանը, համայնքների զարգացմանը, գյուղական շրջաններում և համայնքներում բիզնես միջավայրի աշխուժացմանն ու զարգացմանը, նշված ոլորտներում ձեռնարկատիրական գործունեություն իրականացնող յուրաքանչյուր անձի բարեկեցության աճին:
Մանրամասն՝ տեսանյութում։
--00—ԱՊ