ԵՐԵՎԱՆ, ՄԱՅԻՍԻ 11, 24News
Դարերի խորքից եկող հայ-վրացական բարեկամությունը, որը խարսխված է ընդհանուր արժեքների եւ պատմական ժառանգության վրա, ամուր հենք եւ պարարտ հող է ստեղծում մեր հետագա համագործակցության համար: Այս մասին մայիսի 11-ին ասել է ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի նախագահ Վահե Ղալումյանը Վրաստանի խորհրդարանի տարածաշրջանային քաղաքականության եւ ինքնակառավարման հանձնաժողովի նախագահ Կախա Կախիշվիլիի գլխավորած պատվիրակության հետ հանդիպման ընթացքում, տեղեկանում ենք ՀՀ ազգային ժողովի պաշտոնական կայքից։
Ողջունելով պատվիրակության անդամներին խորհրդարանում` Վահե Ղալումյանը հույս է հայտնել, որ կհաջողվի պարբերաբար համատեղ նիստեր անցկացնել` սերտ համագործակցություն հաստատելով երկու երկրների խորհրդարանների համապատասխան հանձնաժողովների միջեւ: «Հայաստանի կառավարության` 2021-2026 թթ. գործողությունների ծրագրում Վրաստանի հետ առանձնահատուկ բարիդրացիական հարաբերությունների զարգացումն ընդգծված է որպես առաջնահերթություն»,- ասել է Վահե Ղալումյանը` հավելելով, որ Հայաստանը հետաքրքրված է Վրաստանի հետ ռազմավարական գործընկերության հաստատման ուղղությամբ: Նա կարեւորել է երկու երկրների տարբեր գերատեսչությունների միջեւ հաստատված սերտ համագործակցությունը` համոզմունք հայտնելով, որ փոխվստահությունը, շարունակական երկխոսությունն ու համագործակցության ամրապնդումը լրացուցիչ խթան կհանդիսանան տարածաշրջանային անվտանգության ու կայունության համար:
Շնորհակալություն հայտնելով ջերմ ընդունելության համար` Կախա Կախիշվիլին կարեւորել է խորհրդարանական համագործակցությունը եւ բարեկամական խմբերի միջեւ սերտ աշխատանքը: Նա նոր ծրագրերը կյանքի կոչելու ուղղությամբ ակտիվ աշխատելու պատրաստակամություն է հայտնել: Վահե Ղալումյանի խոսքով Վրաստանի հետ հաղորդակցության ուղիների բարելավումը Հայաստանի համար ունի ռազմավարական նշանակություն: «Այսօր արդեն իրականություն է «Բարեկամություն» կամուրջը Բագրատաշեն-Սադախլո հատվածում: Լիահույս ենք, որ արդիականացման եւ բարելավման համատեղ ծրագրերի հաջորդ հանգրվանը կլինի Գոգավան-Գուգութի անցակետը, որը կարեւոր դերակատարություն ունի փոխադրումների բեռնաթափման գործում»,- ասել է հանձնաժողովի նախագահը` անդրադառնալով Վերին Լարսի անցակետի բեռնաթափմանն ուղղված խնդիրներին եւ որպես լուծման նպաստավոր տարբերակ` մատնանշել լաստանավային կանոնավոր հաղորդակցության ապահովումը: Նա նշել է, որ Վերին Լարսի անցակետը գրեթե անփոխարինելի է Հայաստանի համար եւ վերջինիս թողունակության սահմանափակ լինելը, ինչպես նաեւ պարբերաբար առաջացող եղանակային վատթար պայմանները լուրջ մարտահրավեր են մեր երկրի համար: Այս համատեքստում Վահե Ղալումյանը ողջունել է վրացական կողմի քայլերը` ապահովելու պատշաճ տարանցում` ելնելով ինչպես բարեկամական հարաբերություններից, այնպես էլ առաջնորդվելով միջազգային պարտավորություններով:
Կողմերն անդրադարձել են տարածքային կառավարման համակարգում իրականացված բարեփոխումներին եւ մի շարք ոլորտներում փորձի հնարավոր փոխանակման հարցեր քննարկել: Կարեւորվել է երկու երկրների քաղաքացիների` ներքին անձնագրերով տեղաշարժման հնարավորություն ընձեռող համաձայնագրի իրագործումը:
Հանդիպմանը մասնակցել են նաեւ ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի անդամներ ՀՀ ԱԺ «Քաղաքացիական պայմանագիր» խմբակցության պատգամավորներ Լիլիթ Կիրակոսյանը, Մաթեւոս Ասատրյանը, Սերգեյ Բագրատյանը եւ ՀՀ ԱԺ «Հայաստան» խմբակցության պատգամավոր Գառնիկ Դանիելյանը:
--00—ՅՄ