ԵՐԵՎԱՆ, ՀՈԿՏԵՄԲԵՐԻ 4,24News
Freedom House իրավապաշտպան կազմակերպությունը հրապարակել է համացանցի ազատության 2023 թվականի զեկույցը, որի համաձայն՝ Հայաստանը շարունակում է գտնվել «ազատ երկրների» ցանկում: Այս մասին հայտնում է.azatutyun.am-ը։
Ըստ զեկույցի, «թեև առցանց միջավայրը Հայաստանում մնում է բաց, ինտերնետի ազատությունը լուսաբանման ժամանակահատվածում որոշ չափով նվազել է, ինչը մեծավ մասամբ պայմանավորված է 2022 թվականի երկրորդ կեսին հայկական տարածքներ Ադրբեջանի զորամիավորումների ներխուժման հետ կապված տեղեկատվության տարածման սահմանափակումներով, ինչպես նաև հաքերային գրոհների աճով», - ասվում է զեկույցում:
Դրական հանգամանք է համարվում այն, որ կառավարությունն ընդունել է Քրեական օրենսգրքի նոր տարբերակը, որով ապաքրեականացրել է նախորդ տարում հավանության արժանացած և բազում վեճերի ու քննադատության առիթ դարձած «ծանր վիրավորանքը»:
Հայաստանը վաստակել է 72 միավոր: Այն կազմված է հետևյալ բաղադրիչներից. մուտքի խոչընդոտ՝ 19, բովանդակության սահմանափակում՝ 28, և օգտատերերի իրավունքների խախտում՝ 25 միավոր:
Տարածաշրջանում Հայաստանից առաջ է անցել 77 միավոր վաստակած Վրաստանը:
Թուրքիան (30 միավոր), Ադրբեջանը (37 միավոր) և Իրանը (11 միավոր) մնացել են «ոչ ազատ» երկրների ցանկում: Այդ խմբում է նաև 21 միավոր վաստակած Ռուսաստանը:
Զեկույցում նշվում է, որ համաշխարհային ինտերնետի ազատությունը 13 տարի անընդմեջ նահանջ է գրանցում, իրավիճակը վատթարացել է 27 երկրներում և բարելավվել՝ 22-ում:
Զեկույցում ասվում է, որ արհեստական բանականության տեխնոլոգիան կարող է նպաստել առցանց ապատեղեկատվության տարածմանը:
Տեխնիկապես զարգացած ավտորիտար կառավարություններն արհեստական ինտելեկտի «չաթբոտի» տեխնոլոգիաներով փորձել են ուժեղացնել գրաքննության համակարգերը:
--00—ԼՀ