ԵՐԵՎԱՆ, ՓԵՏՐՎԱՐԻ 7, 24News
Ազգային ժողովի պատգամավոր Գուրգեն Արսենյանի որդու՝ Գուրգեն Արսենյանի նկատմամբ հարուցված քրեական վարույթը կարճվել է, հիմքը՝ հանցակազմի բացակայություն, հայտնում է «Արմենպրես»-ը՝ հղում անելով ՀՀ քննչական կոմիտեի նախագահի մամուլի քարտուղար Գոռ Աբրահամյանին։
Նա տեղեկացրել է, որ 2022-ի դեկտեմբերի 27-ին Երևան քաղաքի Մաշտոցի պողոտա-Բյուզանդ փողոցների խաչմերուկի մոտից սառը զենք կրելու կասկածանքով ձերբակալվել և բաժին է տեղափոխվել կրտսեր Գուրգեն Արսենյանը, ում անձնական խուզարկությամբ հայտնաբերվել է 2 հատ կացին և 1 հատ 16.5 սմ շեղբի երկարությամբ դանակ:
Դեպքի առթիվ նույն օրը ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական երրորդ բաժնում ՀՀ քրեական օրենսգրքի 334-րդ հոդվածի 1-ին մասով նախաձեռնվել է քրեական վարույթ:
Հայտնաբերվածի՝ սառը զենք լինելու հանգամանքը պարզելու համար նշանակվել է քրեագիտական փորձաքննություն։
Համաձայն փորձագետի եզրակացության՝ փորձաքննությանը ներկայացված կացիններից մեկը պատրաստված է գործարանային, մյուսը՝ արհեստագործական եղանակով, դրանք ունեն տնտեսակենցաղային նշանակություն և սառը զենք չեն հանդիսանում։ Իսկ դանակը պատրաստված է գործարանային եղանակով, խոհանոցային դանակ է և սառը զենք չի հանդիսանում:
«Հաշվի առնելով, որ Գ․ Արսենյանի արարքում բացակայում են ՀՀ քրեական օրենսգրքի 334-րդ հոդվածի 1-ին մասով նախատեսված հանցակազմի հատկանիշները, կայացվել է քրեական վարույթը կարճելու որոշում»,- ասաց Աբրահամյանը։
Մանրամասները՝ սկզբնաղբյուրում։
--00—ԼՄ