ԵՐԵՎԱՆ, ՍԵՊՏԵՄԲԵՐԻ 29, 24News
Ադրբեջանցիները մեծաքանակ տեխնիկա են կենտրոնացրել և լայնածավալ շինարարական աշխատանքներ են սկսել Գորիս-Կապան միջպետական ավտոճանապարհի՝ իրենց վերահսկողության տակ գտնվող հատվածում, Aysor.am-ի թղթակցի հետ զրույցում ասել է Գորիսի քաղաքապետի տեղակալ Կարո Քոչարյանը։
Նա նշել է, որ շինարարությունը նկատել է այսօր, երբ մի միջոցառման մասնակցելու նպատակով գնալիս է եղել Որոտան գյուղ։
«Հարյուր տոկոսով չեմ կարող ասել՝ ինչ են կառուցում, բայց հավանական է, որ ինչ-որ տերմինալ է։ Կառուցվածքն այն ձևի է, որ մեքենաները մի կողմից պետք է մտնեն, մյուս կողմից դուրս գան։ Ժամանակին այդ հատվածում եղել է ասֆալտ-բետոնի գործարան, որի շենքը հիմա ադրբեջանցիները վերակառուցում են։ Դիմացը մեծ հրապարակ են սարքել, մեր մոտից այդ ամենը պարզ երևում է»,- ասել է Գորիսի փոխքաղաքապետը։
Կարո Քոչարյանը միաժամանակ տեղեկացրել է, որ ադրբեջանցի ոստիկանների ստուգումների հետևանքով իրանական բեռնատարների մեծ կուտակումները շարունակվում են։
«Չեմ կարող ասել՝ գումար գանձում են, թե ոչ, բայց, ամեն դեպքում, կանգնեցնում, ստուգում են»,- ասել է նա։
--00--ԱԹ