ԵՐԵՎԱՆ, ԴԵԿՏԵՄԲԵՐԻ 14, 24News
Քարվաճառում ձերբակալված մարդասպանների նկատմամբ «ռազմագերի» տերմինի կիրառումն անարգանք է նրանց կողմից սպանված հայ երեխայի եւ հայ տղամարդու հիշողության նկատմամբ։ Այս մասին ֆեյսբուքյան իր էջում գրել է սահմանադրագետ Գոհար Մելոյանը։
«Զանգվածային լրատվության միջոցների համար
2014 թվականի հունիսին անչափահաս հայ երեխային առեւանգած եւ հոշոտած, զինվորական չհանդիսացող հայ տղամարդուն սպանած, հայ կնոջը հրազենային վնասվածքներ պատճառած ադրբեջանցիներ՝ Դիլհամ Ասկերովն ու Շահվազ Գուլիեւը միջազգային որեւէ փաստաթղթի հիման վրա չեն կարող հանդիսանալ ռազմագերի!
Նրանք ազգային պատկանելության հիմքով առանձնապես ծանր հանցագործություններ կատարած մարդասպաններ են, որոնց այսօրվա արտահանձման իրավական ընթացակարգը եւ հիմքերը պետք է դառնան մանրամասն քննության առարկա։
Նշված մարդասպանների նկատմամբ «ռազմագերի» տերմինի կիրառումն անարգանք է նրանց կողմից սպանված հայ երեխայի եւ հայ տղամարդու հիշողության նկատմամբ։
Խնդրում եմ զանգվածային լրատվության միջոցներին նշված անձանց որեւէ կերպ չներկայացնել որպես ռազմագերի։
Նույն կերպ ռազմագերի կարող է համարվել քնած հայ սպային գլխատած Ռամիլ Սաֆարովը։
Իսկ գերագույն Դավաճանը թող շարունակի պիտակավորել իր արդարացի ցասումն արտահայտող հայ ազգին՝ անարձագանք թողնելով Ալիեւի վիրավորանքները, եւ ի կատար ածելով այդ ստահակի պահանջները»,- գրել է նա։
--00--ԱՀ