ԵՐԵՎԱՆ, ՕԳՈՍՏՈՍԻ 9, 24News
Բելառուսում ընթացող ԱՊՀ երկրորդ խաղերի մեդալների ոչ պաշտոնական հաշվարկի առաջատարը Ռուսաստանի Դաշնության թիմն է:
«Արմենպրես»-ի թղթակցի հաղորդմամբ` Բելառուսի 10 քաղաքներում ընթացող խաղերում մինչ այս պահն ամենաշատ մեդալ նվաճել է Ռուսաստանի թիմը, որն ընդհանուր առմամբ ունի 125 մեդալ` որոնցից 59-ը ոսկե, 43-ն արծաթե և 23-ը բրոնզե:
Երկրորդ տեղում 24 ոսկե մեդալով Բելառուսն է, իսկ եռյակը եզրափակում է Ուզբեկստանը` 8 ոսկե մեդալով:
Հայաստանի հավաքականն ունի 3 մեդալ և 5-րդ տեղում է: Հայաստանի պատվիրակության կազմում ոսկե մեդալ է նվաճել ըմբիշ Սահակ Հովհաննիսյանը, բրոնզե մեդալակիր է դարձել ըմբիշ Սամվել Գրիգորյանը և արծաթե մեդալ է նվաճել Նարե Գաբրիելյանը:
Բելառուսի Հանրապետությունում անցկացվում են ԱՊՀ 2-րդ խաղերը, որին Հայաստանը մասնակցում է մեծաթիվ պատվիրակությամբ: 140-ից ավելի պատանի և երիտասարդ մարզիկներ Հայաստանի մարզական պատիվը կպաշտպանեն բռնցքամարտ, ազատ և հունահռոմեական ոճի ըմբշամարտ, ձյուդո, կարատե, ատլետիկա, լող, ծովափնյա վոլեյբոլ, սամբո, նետաձգություն, հրաձգություն, խոտի հոկեյ, մարմնամարզություն և վոլեյբոլ մարզաձևերում: ԱՊՀ 2-րդ խաղերը կանցկացվեն Բելառուսի տարբեր շրջանների 11 քաղաքում։ Նոր ձևաչափի նպատակն է ընդլայնել մրցաշարի աշխարհագրությունը և սպորտի մասսայականացումը երկրի տարբեր հատվածներում: Մասնավորապես, մրցումները կանցկացվեն Մինսկ, Բորիսով, Բրեստ, Վիտեբսկ, Գոմել, Գրոդնո, Ժլոբին, Մոգիլյով, Մոլոդեչնո, Օրշա և Սոլիգորսկ քաղաքներում։ 23 երկրի շուրջ 5 հազար մարզիկներ իրենց ուժերը կչափեն ընդհանուր առմամբ 20 մարզաձևում: Խաղերի փակման արարողությունը նախատեսված է օգոստոսի 13-ին:
--00—ԼՀ