ԵՐԵՎԱՆ, ՍԵՊՏԵՄԲԵՐԻ 13, 24News
ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը սեպտեմբերի 13-ին ընդունել է ՀՀ-ում Հարավաֆրիկյան Հանրապետության արտակարգ եւ լիազոր դեսպան Անդրե Յոհաննես Խրունեւալդիին: Այս մասին տեղեկանում ենք ՀՀ ԱԺ պաշտոնական կայքից։
Ողջունելով դեսպանին խորհրդարանում՝ Սարգիս Խանդանյանը նշել է, որ Հայաստանը կարեւորում է Հարավաֆրիկյան Հանրապետության հետ բազմաբնույթ հարաբերությունների զարգացումը եւ պատրաստակամ է ակտիվացնել փոխգործակցութունը տարբեր բնագավառներում ու վեր հանել այն ուղղությունները, որտեղ առկա են իրական նախադրյալներ եւ փոխադարձ հետաքրքրություն:
Դեսպանը, շնորհակալություն հայտնելով ջերմ ընդունելության համար, նշել է, որ պատրաստակամ է աջակցել երկու երկրների փոխգործակցության ձեւավորման եւ զարգացման գործընթացին նպաստող աշխատանքներին:
Քաղաքական երկխոսության համատեքստում Սարգիս Խանդանյանը կարեւորել է խորհրդարանական դիվանագիտության դերն ու նշանակությունը: Նրա խոսքով միջխորհրդարանական կապերը խթանում են երկկողմ հարաբերությունների փոխըմբռնման եւ փոխվստահության մթնոլորտի ձեւավորումը:
Նշվել է, որ մի շարք ոլորտներում փոխգործակցության իրատեսական ներուժ կա, որի ուղղությամբ անհրաժեշտ է քայլեր ձեռնարկել եւ առավել արդյունավետ օգտագործել դրանից բխող հնարավորությունները:
--00—ՅՄ