ԵՐԵՎԱՆ, ԱՊՐԻԼԻ 25, 24News
Այսօր, երբ կորոնավիրուսը շարունակում է հազարավոր կյանքեր խլել աշխարհում, ԱՄՆ-ի պետքարտուղար Մայք Փոմփեոն դատապարտում է Չինաստանի կառավարող Կոմունիստական կուսակցությանը` մահաբեր վիրուսի մասին տեղեկությունները գաղտնի պահելու համար: Նա քննադատում է նաեւ Առողջապահության համաշխարհային կազմակերպությանը` Պեկինից պատասխանատվություն չպահանջելու համար: Այս մասին հայտնում է «Ամերիկայի ձայնը»։
«Չինաստանը չի տրամադրել ամբողջ տեղեկատվությունը: Փոխարենն այն կոծկել է հիվանդության վտանգավորության աստիճանը եւ մեկ ամիս ոչինչ չի ասել մարդուց մարդ վարակը տարածվելու փաստի մասին եւ սպառնացել է բոլոր նրանց, ովքեր փորձել են տեղեկություններ հայտնել աշխարհին», - ասել է Փոմփեոն:
Ամերիկան Առողջապահության համաշխարհային կազմակերպության գլխավոր դոնորն է, եւ մեծաթիվ փորձագետներ են ասում, որ ամենեւին ժամանակը չէ կազմակերպության ֆինանսավորումը դադարեցնելու համար:
Դյուքի համալսարանի պրոֆեսոր Գեյվին Յամեյի խոսքերով, ֆինանսավորումը դադարեցնելու որոշումը չափազանց տարօրինակ, անհասկանալի որոշում է, որից առավել վնասակար գործողություն ինքը պատկերացնել չի կարող:
Նա նշում է Առողջապահության համաշխարհային կազմակերպության կողմից աշխարհի տարբեր երկրների ցուցաբերվող գիտական առումով օգնությունը, թեստավորման ու պաշտպանիչ պարագաների հատկացումը:
Իսկ Փոմփեոն հայտարարում է, թե կորոնավիրուսի դեմ պայքարը ղեկավարում է ԱՄՆ-ը, որը նրա խոսքերով, 100 երկրների հատկացնում է 775 միլիոն դոլար:
«ԱՄՆ-ը աշխարհում ամենաառատաձեռն պետությունն է, այդպես է եղել անցած երեք տարիներին ու շարունակելու է լինել այդպիսին այս տարի», -ասել է Փոմփեոն:
Առողջապահության համաշխարհային կազմակերպությունը հերքում է Չինաստանի նկատմամբ հակված լինելու մասին մեղադրանքները եւ նույնպես պնդում, որ համաշխարհային համաճարակի ժամանակ ֆինանսավորման դադարեցումը կարող է լինել ճակատագրական: