ԵՐԵՎԱՆ, ՄԱՅԻՍԻ 28, 24News
«Ժողովուրդ» օրաթերթը գրում է. «Հայաստանում ավելացել են այն հողատարածքները, որոնք վարակվել են մորեխներով եւ մկնանման կրծողներով: «Ժողովուրդ» օրաթերթը ՀՀ վիճակագրական կոմիտեից տեղեկացավ, որ 2020 թվականին մորեխներով եւ մկնանման կրծողներով վարակված են 153 հազար 528 հա գյուղատնտեսական հողատարածքներ:
Միայն 73 հազար 528 հա հողատարածք գտնվում է մկնանման կրծողների տիրապետության տակ, իսկ 80 հազար հա վարակված են մորեխներով: 2019 թվականի համեմատ՝ դա ավել է 26 հազար 417 հա-ով: Մեզ հայտնի դարձավ, որ 2019 թվականին մորեխներով եւ մկնանման կրծողներով վարակված է եղել 127 հազար 111 հա հողատարածք:
«Ժողովուրդ» օրաթերթը տեղեկացավ, որ մկներով եւ մորեխներով վարակված հողատարածքներ ավելի շատ գտնվում են Արագածոտնի մարզում՝ 17 հազար 628 հա: Եւ ամենացավալին այն է, որ մեր հանրապետությունում որեւէ պետական կառույց չկա, որպեսզի պայքարի մկների եւ մորեխների դեմ այն դեպքում, երբ Հայաստանը համարվում է գյուղատնտեսական երկիր, եւ հենց տնտեսության այս ճյուղն է կազմում մեր ՀՆԱ-ի զգալի մասը:
Բայց, չնայած սրան, Հայաստանում անգամ գյուղատնտեսության նախարարություն չկա, իսկ գյուղատնտեսության ոլորտի այս օրերի միակ պատասխանատուն՝ Էկոնոմիկայի նախարարությունը, ոչինչ չի ձեռնարկում»:
Առավել մանրամասն՝ թերթի այսօրվա համարում
--00--ԱՀ