ԵՐԵՎԱՆ, ԱՊՐԻԼԻ 25, 24News
Հայաստանի արտաքին առևտրաշրջանառությունը տարեսկզբից կայուն աճել է: «Արմենպրես»-ի հաղորդմամբ՝ այդ մասին փաստող ցուցանիշներ է ներկայացրել ՀՀ վիճակագրական կոմիտեն:
Երկրի սոցիալ-տնտեսական վիճակը բնութագրող ընթացիկ-օպերատիվ ամփոփմամբ ստացված նախնական հիմնական մակրոտնտեսական ցուցանիշների մասին հաշվետվությունից հետևում է, որ այս տարվա մարտին արտաքին առևտրաշրջանառությունը կազմել է 3 մլրդ 568.2 մլն դոլար: Մեկամյա վաղեմության ցուցանիշը գերազանցվել է 2.1 անգամ: Այս տարվա փետրվարի համեմատ աճը կազմել է 7.3 տոկոս: Ընթացիկ տարվա առաջին քառամսյակում այն կազմել է 9 մլրդ 169.7 մլն դոլար, ինչը նույնպես 2.1 անգամ գերազանցում է նախորդ տարվա նույն ժամանակահատվածի ցուցանիշը:
Արտահանման ծավալը մարտին կազմել է 1 մլրդ 845.4 մլն դոլար՝ 3 անգամ գերազանցելով 2023 թվականի նույն ամսվա ցուցանիշը: Այս տարվա փետրվարի համեմատ աճը կազմել է 13.1 տոկոս: Հունվար-մարտ ամիսներին Հայաստանից արտահանվել է 4 մլրդ 422.8 մլն դոլարի ապրանք, ինչը 2.7 անգամ գերազանցում է նախորդ տարվա նույն ժամանակահատվածի ցուցանիշը:
Այս տարվա մարտին երկիր է ներմուծվել 1 մլրդ 722.8 մլն դոլարի ապրանք: Անցյալ տարվա մարտի համեմատ աճը կազմել է 56.2 տոկոս: 2024 թվականի փետրվարի համեմատ ներկրումն ավելացել է 1.8 տոկոսով: Ընթացիկ տարվա հունվար-մարտ ամիսներին Հայաստան ներկրված ապրանքների ծավալը կազմել է 4 մլրդ 746.9 մլն դոլար: Նախորդ տարվա նույն ժամանակահատվածի ցուցանիշը գերազանցվել է 75.8 տոկոսով:
2024-ի մարտին դրամի փոխարժեքը ներկայացված է ԱՄՆ 1 դոլարի դիմաց 400.42 դրամի հաշվարկով: Հունվար-մարտ ամիսներին դոլարի արժեքը կազմել է 403.22 դրամ:
--00—ՅՄ