ԵՐԵՎԱՆ, ՄԱՐՏԻ 20, 24News
Աշխարհի տարբեր երկրներում կորոնավիրուսի համավարակի պատճառով որոշ խոշոր արտադրողներ արդեն հայտարարել են իրենց գործարանների աշխատանքները ժամանակավորապես դադարեցնելու մասին: Դրանց շարքում է նաև ճապոնական ավտոարտադրող «Honda» ընկերությունը, որը որոշել է փակել իր արտասահմանյան գործարանները, այդ թվում Թուրքիայում գտնվող խոշոր գործարանը,- հաղորդում է Ermenihaber-ը:
Ընկերության տարածած հայտարարության մեջ մասնավորապես նշվում է, որ Covid-19 համավարակի պատճառով մարտի 23-ից սկսած ժամանակավորապես դադարեցվելու է Թուրքիայի Քոջաելի նահանգի Շեքերփընար շրջանում գտնվող իր գործարանի աշխատանքը։
Ընկերությունը նախատեսում է արտադրական գործընթացը վերսկսել սույն թվականի ապրիլի 6-ից։ Սակայն հաշվի են առնվելու համավարակի իրավիճակը և շուկայական պայմանները։
Հիշեցնենք, որ ավելի վաղ «Toyota» և «Ford» ընկերությունները հայտարարել էին Թուրքիայում գործարանները որոշ ժամանակով փակելու մասին։ Նախորդ շաբաթ «Honda»-ն և «Toyota»-ն դադարեցրել էին արտադրությունը նաև Չինաստանում։