ԵՐԵՎԱՆ, ԱՊՐԻԼԻ 8, 24News
Արարատի մարզում այսօր խոշոր ավտովթար է տեղի ունեցել: Ժամը 19:00-ի սահմաններում BMW մակնիշի ավտոմեքենան Երևան-Երասխ ավտոճանապարհի 20-րդ կմ հատվածում դուրս է եկել երթևեկելի գոտուց, բախվել գազատար խողովակներին ու հենասյուներին և հայտնվել դաշտում, հայտնում է shamshyan.com-ը։
Վթարի հետևանքով 2 հոգի տարբեր աստիճանի մարմնական վնասվածքներով տեղափոխվել «Էրեբունի» բժշկական կենտրոն:
Վիրավորներին առաջինը օգնության են հասել քաղաքացիները և օպերատիվորեն ժամանած Արտակարգ իրավիճակների նախարարության փրկարար ծառայության Արտաշատի հրշեջ-փրկարարական ջոկատի հրշեջ-փրկարարները:
Քանի որ վթարի հետևանքով գազի արտահոսք է սկսվել, օպերատիվորեն ժամանել են նաև «Գազպրոմ Արմենիա» Արտաշատի ԳԳՄ-ի 1-04 վթարային ծառայության աշխատակիցները, ովքեր ժամանակավորապես դադարեցրել են գազամատակարարումը և այս պահին էլ ձեռնարկում են անհրաժեշտ աշխատանքներ՝ վթարային իրավիճակը շուտ շտկելու ուղղությամբ: Վթարի հետևանքով 25 երկաթյա հենասյուներ են տապալվել:
Փաստի առթիվ նյութեր են նախապատրաստվում: Ոստիկանությունը պարզում է վարորդի և վիրավորների ինքնությունը: Կայքի տեղեկություններով՝ վարորդն ու վիրավորը քույրեր են:
--00--ԱՀ