ԵՐԵՎԱՆ, ՀՈՒՆԻՍԻ 10, 24News
Հայաստանի նախագահը «Հորասիս» միջազգային հեղինակավոր վերլուծական կենտրոնի առցանց հանդիպմանը, հանդես գալով որպես հիմնական բանախոս, անդրադարձել է Ադրբեջանի՝ հայ ռազմագերիներին և քաղաքացիական անձանց չվերադարձնելու խնդրին:
Հրադադարից հետո հարյուրավոր հայ ռազմագերիներ դեռ Ադրբեջանում են: Հայկական կողմը բոլորին վերադարձրել է, իսկ Ադրբեջանը դա չի արել: Պատերազմից հետո դեպի ապագա նայելու համար պետք էր մտածել կայունության և հարևանների հետ վստահության մթնոլորտ ձևավորելու մասին, սակայն, ըստ նախագահի, չես կարող վստահության մթնոլորտ ձևավորել, երբ Հայաստանում հարյուրավոր ընտանիքներ սպասում են իրենց երեխաների վերադարձին:
Պատասխանելով մոդերատորի հարցին, թե որքանով է դժվար երկրի կամ ժողովրդի համար սիրել հարևանին, եթե կա պատերազմ, նախագահ Սարգսյանը մասնավորապես ասել է. «Սիրել չի նշանակում, որ կարող ես վաղն անմիջապես անցնել հարաբերությունների կարգավորմանը: Սակայն դա այն ճանապարհն է, որով պետք է սկսես անցնել այսօր: Հայերն ու թուրքերը չեն կարող փորձել միասին ևս 100 կամ 200 տարի ապրել առանց գիտակցելու, որ պետք է առնվազն հարգել միմյանց իրավունքները: Իսկ թե միմյանց հանդեպ հարգանքը կարելի՞ է սեր անվանել, դուք որոշեք: Սակայն կարևոր է միմյանց իրավունքները հարգելը: Եթե այսօր Ադրբեջանը վերադարձնի ռազմագերիներին, վստահեցնում եմ, որոշ հայեր ինչ-որ կերպ, թեկուզ դժվարությամբ, կգնահատեն դա»:
--00—ԼՄ