Նիդերլանդների դեսպանը Սյունիքում հետևել է՝ ինչպես կարելի է գործել արտակարգ իրավիճակներում

Հայաստանում Նիդերլանդների Թագավորության դեսպան Մարիկե Մոնրոյ-Վինթերը Սյունիքի մարզ աշխատանքային այցն ավարտել է Սիսիանի տարածաշրջանում։ Դեսպանն այցելել է Ույծ համայնք, որտեղ «Սոսե» ՀԿ-ն դեսպանատան աջակցությամբ իրականացնում է դասընթաց՝ կանանց պատրաստվածությունը ճգնաժամային իրավիճակներում թեմայով։ 

Դասընթացն իրականացվում է Սյունիքի մարզի 10 համայնքներում։ Ույծում դեսպանը ծանոթացել է մասնակիցների հետ, ովքեր տեսական ու գործնական պարապմունքների միջոցով ձեռք են բերում ինքնակազմակերպման հմտություններ արտակարգ իրավիճակներում, ինչպես նաև տիրապետում են անվտանգության վարքագծի կանոններին աղետների կամ պատերազմական պայմաններում։
 

Դեսպան Մոնրոյ-Վինթերի՝ Սյունիքի մարզ աշխատանքային այցն եզրափակվել է ContourGlobal Hydro Cascade CJSC-ում՝ ճանաչողական նպատակով։ Նիդերլանդների զարգացման բանկի (FMO) մասնաբաժինը ներառված է Որոտանի հիդրոկասկադին տրամադրված ֆինանսավորման փաթեթում։ Ծրագրի շնորհիվ այսօր հիդրոէլեկտրակայանն իր ուրույն տեղն ունի վերականգնվող էներգետիկայի արտադրության ոլորտում։