ԵՐԵՎԱՆ, ՆՈՅԵՄԲԵՐԻ 9, 24News
Մինչև հունվարի 1-ը Երևանում բոլոր գովազդները պետք է համապատասխանեցվեն ավագանու սահմանած նոր չափորոշիչներին: Հատուկ տնտեսվարողների համար Երևանի քաղաքապետարանը մշակել է ուղեցույց:
«Մեր նպատակն է, որ քաղաքը մաքրվի խեղդող գովազդներից և ավելի ներկայանալի դառնա», - նշում է քաղաքապետի տեղակալ Սուրեն Գրիգորյանը:
Շենքերի վրա փակցվող գովազդն առաջին հերթին պետք է չխաթարի շենքի ճարտարապետական արտաքին տեսքը: Չեն լինի նաև վազող տողերը, կտորե ու ստվարաթղթե ինքնակպչուն պաստառները:
Գովազդը շենքին կարող է լինել հորիզոնական դասավորված, ուղղահայաց տառերով և առանց հետնամասի հարթակի: Ցուցափեղկերին՝ չծածկի մակերեսի 75 %-ը և չպարունակի կոնտակտային տվյալներ: Տանիքներին գովազդը թույլատրելի է, եթե շենքը առնվազն 4 հարկանի է: Սրանք չափորոշիչների միայն մի մասն են, ամբողջական ցանկը տեղադրված է Yerevan.am կայքում:
Նոր չափորոշիչներով արգելվել են նաև քաղաքում գովազդային մեծ՝ 3/6 չափի վահանակները: Բաղրամյան պողոտայում դրանք արդեն ապամոնտաժված են: Այս օրերին բոլոր տնտեսվարողները ծանուցվում են, նախազգուշացվում: Զուգահեռաբար ապամոնտաժվում են առանց թույլտվության տեղադրված գովազդները: Միայն հոկտեմբերին 312 գովազդ է ապամոնտաժվել:
Քաղաքապետարանը պատրաստ է խորհրդատվություն տրամադրել յուրաքանչյուր տնտեսվարողի, միայն թե համատեղ ուժերով վերականգնվի քաղաքի արտաքին տեսքը: Չփոփոխված ու սահմանված չափորոշիչներին չհամապատասխանող գովազդները հունվարի 1-ից քաղաքապետարանն ստիպված կլինի ապամոնտաժել:
--00—ԼՀ