ԵՐԵՎԱՆ, ՀՈՒԼԻՍԻ 1, 24News

Բաքվի ոչ բարեկամական գործողությունների կապակցությամբ Ռուսաստանում Ադրբեջանի դեսպան Ռախման Մուստաֆաևին բողոքի նոտա է հղվել։ Նրան բանավոր նոտա է հանձնվել՝ պահանջելով անհապաղ ազատ արձակել ձերբակալված ռուս լրագրողներին, հաղորդում է ռուսական դիվանագիտական ​​գործակալությունը։

«Ռուսաստանի Դաշնության փոխարտգործնախարար Միխայիլ Գալուզինի հետ հանդիպման ժամանակ դեսպանին բողոքի նոտա է հղվել Բաքվի վերջին ոչ բարեկամական գործողությունների, ադրբեջանական կողմից երկկողմ հարաբերությունները խաթարելու միտումնավոր քայլերի կապակցությամբ։ Ադրբեջանի դիվանագիտական ​​առաքելության ղեկավարին բանավոր նոտա է հանձնվել՝ պահանջելով անհապաղ ազատ արձակել Բաքվում ձերբակալված ռուս լրագրողներ Իգոր Կարտավիխին և Եվգենի Բելոուսովին», – ասվում է Ռուսաստանի արտաքին գործերի նախարարության կայքում հրապարակված հայտարարության մեջ։

Հիշեցնենք, որ Ադրբեջանի ՆԳՆ-ն հայտարարել է Բաքվի «Սպուտնիկ Ադրբեջանի» գրասենյակում «գործողության» մասին: Մոսկվայի «Սպուտնիկ» գործակալությունը «ՌԻԱ Նովոստի»-ին հայտնել է, որ խմբագրության հետ կապ չի եղել: Շենքի դիմաց կայանված էին Ադրբեջանի ՆԳՆ պարեկային մեքենաներ և սև միկրոավտոբուսներ՝ մգեցված ապակիներով:

Ավելի ուշ «Սպուտնիկ» գործակալությունը հայտնել է, որ Բաքվի անվտանգության ուժերը անհեթեթ մեղադրանքներով ձերբակալել են երկու ռուս լրագրողների՝ «Սպուտնիկ Ադրբեջան»-ի խմբագրական խորհրդի ղեկավար Իգոր Կարտավիխին և գլխավոր խմբագիր Եվգենի Բելոուսովին։ Ինչպես ճշտել է գործակալությունը, տեղական լրատվամիջոցների հաղորդագրությունների համաձայն, աշխատակիցներին անհեթեթ մեղադրանքներ են առաջադրվել, թե իբր նրանք «ԱԴԾ գործակալներ» են։

Փետրվարին Ադրբեջանի արտաքին գործերի նախարարությունը հայտարարել է «Սպուտնիկ» գործակալության գործունեությունը հանրապետությունում դադարեցնելու մտադրության մասին։ «Սպուտնիկ»-ի խմբագրական խորհուրդը հայտնել է, որ Ադրբեջանում աշխատանքի վերաբերյալ պաշտոնական արգելքներ չեն ստացվել. այս ամբողջ ընթացքում երկու երկրների արտաքին գործերի նախարարությունների աշխատանքային խմբերի միջև կառուցողական երկխոսություն է ընթանում հնարավոր անհամաձայնությունների լուծման թեմայով։

–00—ՅՄ