ԵՐԵՎԱՆ, ՕԳՈՍՏՈՍԻ 10, 24News

ԱՄՆ գաղտնի ծառայությունը, «ՌԻԱ Նովոստի»-ին տված մեկնաբանությունում, հրաժարվել է քննարկել ԱՄՆ նախագահ Դոնալդ Թրամփի պաշտպանության «միջոցներն ու մեթոդները» օգոստոսի 15-ին Ալյասկայում նախատեսված Ռուսաստանի նախագահ Վլադիմիր Պուտինի հետ գագաթնաժողովում։

Կրեմլը և Սպիտակ տունը ավելի վաղ հայտարարել էին, որ Պուտինը և Թրամփը կհանդիպեն Ալյասկայում օգոստոսի 15-ին։ Ինչպես պարզաբանել է Ռուսաստանի առաջնորդի օգնական Յուրի Ուշակովը, ԱՄՆ նախագահի հատուկ ներկայացուցիչ Սթիվեն Ուիթքոֆֆը Ռուսաստան կատարած այցի ժամանակ Կրեմլում նշել է Պուտինի, Թրամփի և Վլադիմիր Զելենսկու միջև եռակողմ հանդիպման հնարավորությունը, սակայն ռուսական կողմը այն թողել է առանց մեկնաբանության՝ առաջարկելով կենտրոնանալ երկկողմ գագաթնաժողովի նախապատրաստման վրա։ Ռուսաստանի նախագահը հինգշաբթի օրը նշել է, որ Զելենսկու հետ իր հանդիպումը հնարավոր է, բայց նման բանակցությունների համար պետք է լինեն պայմաններ, որոնք դեռևս շատ հեռու են ստեղծվելուց։

«Նախագահի (Թրամփի – խմբ.) պաշտպանությունն ու անվտանգությունը ԱՄՆ գաղտնի ծառայության բարձրագույն առաջնահերթությունն է։ Գործառնական անվտանգության նկատառումներից ելնելով՝ մենք չենք քննարկում մեր պաշտպանական գործողությունների համար օգտագործվող կոնկրետ միջոցներն ու մեթոդները», – գործակալությանը տված մեկնաբանության մեջ ասել է ծառայության ներկայացուցիչը։

–00—ՅՄ