ԵՐԵՎԱՆ, ՀՈՒՆԻՍԻ 18, 24News

Իսրայելի ռազմաօդային ուժերն առավոտյան ժամերին գրոհել են   ևս ավելի քան 40 ռազմական օբյեկտի վրա Իրանի արևմուտքում:

«Արմենպրես»-ի փոխանցմամբ՝ այս մասին հայտնել է Իսրայելի պաշտպանության բանակի (ԻՊԲ) մամուլի ծառայությունը:

Հայտարարության համաձայն՝ հարվածների թիրախները, մասնավորապես, եղել են հրթիռային պահեստները և հրթիռային զենքի հետ կապված այլ օբյեկտներ:

Գրոհներին մասնակցել է Իսրայելի ռազմաօդային ուժերի մոտ 25 կործանիչ, հավելել են ԻՊԲ-ում:

Բացի այդ, ըստ հայտարարության, գիշերն իսրայելական օդուժը հարվածներ է հասցրել Emad բալիստիկ հրթիռներով լիցքավորված և Իսրայելի ուղղությամբ արձակման պատրաստ արձակման կայանքին:

Ինչպես ճեպազրույցում հայտնել է ԻՊԲ պաշտոնական ներկայացուցիչ բրիգադային գեներալ Էֆի Դեֆրինը, իսրայելցի զինվորականները գիշերվա ընթացքում ֆիքսել են Իրանից մոտ 30 հրթիռի արձակում Իսրայելի ուղղությամբ, զոհեր չկան: Հրթիռների մեծ մասը կալանվել է, հավելել է նա:

Ավելի վաղ Իսրայելի պաշտպանության բանակը հայտնել էր, որ գիշերը ռազմաօդային ուժերը հարվածներ են հասցրել Թեհրանում գտնվող ցենտրիֆուգների արտադրության օբյեկտի և զենքի գործարանների։

Գիշերվա ռազմական գործողություններում ներգրավվել է 50-ից ավելի կործանիչ։

ԻՊԲ-ն հայտնել էր, որ ցենտրիֆուգների արտադրամասը ծառայում էր Իրանի ուրանի հարստացման ծավալների ընդլայնման նպատակներին։

—00—ՄԱ