ԵՐԵՎԱՆ, ՀՈՒՆԻՍԻ 12, 24News

ԱՄՆ պետքարտուղար Մարկո Ռուբիոն ամերիկացի ժողովրդի անունից Ռուսաստանի ժողովրդին շնորհավորել է Ռուսաստանի օրվա կապակցությամբ։ «Արմենպրես»-ի փոխանցմամբ՝ այս մասին հաղորդագրություն է տարածել ԱՄՆ պետքարտուղարությունը։

«Միացյալ Նահանգները շարունակում է հավատարիմ մնալ ռուս ժողովրդին աջակցելու հարցում, մինչ նրանք շարունակում են առաջ մղել ավելի պայծառ ապագայի իրենց ձգտումները», – հայտարարել է Ռուբիոն:Նա նաև վերահաստատել է, որ Վաշինգտոնը ցանկանում է կառուցողական շփումներ ունենալ Մոսկվայի հետ՝ ռուս-ուկրաինական հակամարտության կարգավորման համար։

«Մենք նաև օգտվում ենք այս հնարավորությունից՝ վերահաստատելու Ռուսաստանի Դաշնության հետ կառուցողական փոխգործակցության Միացյալ Նահանգների ցանկությունը՝ Ռուսաստանի և Ուկրաինայի միջև տևական խաղաղություն հաստատելու համար։ Մենք հույս ունենք, որ խաղաղությունը կնպաստի մեր երկրների միջև ավելի փոխշահավետ հարաբերություններին», – եզրափակել է ԱՄՆ պետքարտուղարը։