ԵՐԵՎԱՆ, ՀՈՒՆԻՍԻ 6, 24News

Ուկրաինայի հատուկ ծառայությունները շարունակում են մշակել բարդ հատուկ գործողություններ Ռուսաստանի Դաշնության տարածքում՝ նպատակ ունենալով ընդլայնել պատերազմական գործողությունների աշխարհագրությունը ռազմաճակատից դուրս։ «Արմենպրես»-ի հաղորդմամբ՝ այս մասին հայտնում է The Washington Post-ը՝ վկայակոչելով Ուկրաինայի հետախուզական մարմիններում աշխատող անանուն աղբյուրներին։

Ըստ թերթի՝ Ուկրաինայի անվտանգության ծառայությունը և Զինված ուժերի գլխավոր հետախուզական վարչությունը համակարգված աշխատում են նման գործողությունների ուղղությամբ։ Որպես օրինակ նշվում է «Սարդոստայն» («Паутина») անունը կրող հատուկ գործողությունը, որի իրականացումից հետո Վաշինգտոնում քննարկվել է Ուկրաինային ռազմական աջակցության վերանայման հնարավորությունը, ինչպես նաև հիշատակվում է հարձակումը Ղրիմի կամրջի վրա։

The Washington Post-ի փոխանցմամբ՝ այս գործողությունները հանդիսանում են Ուկրաինայի հետախուզական ռազմավարության մաս՝ միտված ռազմական գործողությունների գոտու ընդլայնմանը՝ ռազմաճակատի դասական սահմաններից դուրս։ Այդ ռազմավարության համատեքստում նշվում է նաև Ուկրաինայի ԳՀՎ-ի կողմից իրականացված հարվածը Վլադիվոստոկի մերձակայքում՝ Դեսանտնայա ծովածոցի շրջանում գտնվող ռուսական ռազմաբազային։ Այդ հարվածն, ըստ աղբյուրների, դարձել է պատերազմի սկզբից ի վեր Ուկրաինայի իրականացրած ամենահեռավոր հարձակումը Ռուսաստանի տարածքում։

–00—ՅՄ