ԵՐԵՎԱՆ, ՀՈՒՆԻՍԻ 4, 24News

Թուրքիայի պաշտպանության նախարար Յաշար Գյուլերը օտարերկրյա լրագրողների հետ զրույցում անդրադարձել է Սիրիայում գտնվող թուրքական ռազմական ներկայությանը: Այս մասին գրում է Էրմենիհաբերը:

ԻՆչպես հայտնի է վերջին տարիներին Թուրքիան քրդական ուժերի դեմ մի շարք խոշոր ռազմական գործողություններ է իրականացրել, որոնց հետևանքով Սիրիայի հյուսիսը դեռևս Սիրիայի նախկին նախագահի ժամանակաշրջանից փաստացի հայտնվել էր թուրքական բանակի վերահսկողության տակ:

Լրագրողներից մեկը հետաքրքրվել է, թե արդյոք Սիրիայում տեղի ունեցած իշխանափոխությունից հետո Թուրքիայի զինված ուժերը դուրս կգան Սիրիայից, քանի որ ներկայիս Սիրիայի իշխանություններն ունեն բարիդրացիական հարաբերություններ Անկարայի հետ:

«Թուրքիան կվերագնահատի Սիրիայում իր ռազմական վիճակը, երբ ահաբեկչական սպառնալիքն ամբողջությամբ վերացվի, սահմանների անվտանգությունն ապահովվի, իսկ փախստականներն ապահով վերադառնան իրենց տներ»,-նշել է նա:

Նշենք, որ չնայած քրդական ուժերին հասցված ծանր կորուստներին, նրանք դեռևս Սիրիայի որոշ շրջաններում պահպանում են ներկայություն:

–00–ԱՀ