ԵՐԵՎԱՆ, ՄԱՅԻՍԻ 23, 24News

Կիսապաշտպան Լուկա Մոդրիչը հայտարարեց «Ռեալ Մադրիդից» հեռանալու մասին Աշխարհի ակումբային առաջնությունից հետո։

«Սիրելի՛ «Ռեալ Մադրիդի» երկրպագուներ, ժամանակը եկել է։ Մի պահ, որը երբեք չէի ցանկացել, բայց սա ֆուտբոլ է, և կյանքում ամեն ինչ ունի սկիզբ և ավարտ… Շաբաթ օրը ես կանցկացնեմ իմ վերջին հանդիպումը «Սանտիագո Բերնաբեուում»։

Ես 2012 թվականին ժամանեցի աշխարհի լավագույն թիմի մարզաշապիկը կրելու և մեծ հաջողությունների հասնելու ցանկությամբ, բայց նույնիսկ չէի կարող պատկերացնել, թե ինչ կլինի հետո։ Հանդես գալով «Ռեալ Մադրիդի» կազմում՝ ես սկսեցի ապրել՝ որպես ֆուտբոլիստ և որպես մարդ։ Ես զգում եմ, որ պատմության լավագույն ակումբի ներկայացուցիչ եմ։

Ցանկանում եմ սրտիս խորքից շնորհակալություն հայտնել ակումբին, հատկապես նախագահ Ֆլորենտինո Պերեսին, թիմակիցներիս, մարզիչներին և բոլոր նրանց, ովքեր օգնել են ինձ այս ամբողջ ընթացքում։ Տարիների ընթացքում ես ապրել եմ անհավանական պահեր, անհնար թվացող ռևանշներ, եզրափակիչներ, տոնակատարություններ և կախարդական գիշերներ «Բերնաբեուում»… մենք հաղթեցինք ամեն ինչ, և ես շատ ուրախ էի։ Շատ, շատ ուրախ։

Այնուամենայնիվ, տիտղոսներից և հաղթանակներից զատ, ես սրտումս կրում եմ «Ռեալ Մադրիդի» բոլոր երկրպագուների համակրանքը։ Ես իսկապես չգիտեմ, թե ինչպես բացատրել այն հատուկ կապը, որը ես ունեմ ձեզ հետ, և թե ինչպես են ինձ աջակցել, հարգել և սիրել։ Ես երբեք չեմ մոռանա ձեր յուրաքանչյուր ծափահարությունն ու ջերմության յուրաքանչյուր ժեստ, որ դուք ցուցաբերեցիք ինձ։ Ես հեռանում եմ լի սրտով։ Լի հպարտությամբ, երախտագիտությամբ և անմոռանալի հիշողություններով։ Եվ չնայած ես այլևս չեմ կրելու այս մարզաշապիկը Ակումբային աշխարհի առաջնությունից հետո, ես միշտ կմնամ Մադրիդի երկրպագու», — գրել է Մոդրիչը իր հրաժեշտի նամակում։

Armsport

–00—ՍՊ