ԵՐԵՎԱՆ, ՀՈՒԼԻՍԻ 19, 24News

Ադրբեջանագետ Տաթևիկ Հայրապետյանը գրում է. «Բառացի և թարգմանաբար ներկայացնում եմ հուլիսի 17-ի ճեպազրույցի ժամանակ ԱՄՆ պետքարտուղարության խոսնակ Թեմմի Բրյուսի և ադրբեջանցի լրագրողի հարցուպատասխանը․

ՀԱՐՑ․ Շնորհակալություն, տիկին Բրյուս։ Ես Ահմադ Շահիդովն եմ՝ Ադրբեջանից, և ցանկանում եմ Ձեզ հարց ուղղել «Զանգեզուրի միջանցքի» (չակերտները իմն են ) վերաբերյալ, քանի որ այս պահին Հարավային Կովկասում ակտիվ քննարկումներ են ընթանում «Զանգեզուրի միջանցքի» (չակերտները իմն են ) բացման շուրջ՝ Հայաստանի և Ադրբեջանի միջև։

Շատերը կարծում են, որ այս նախագիծը կարող է նպաստել տարածաշրջանում փոխադրումների, առևտրի և փոխվստահության զարգացմանը։ Նախորդ շաբաթ ԱՄՆ դեսպանը Թուրքիայում՝ Թոմաս Բարաքը, նշել էր, որ ամերիկյան մի ընկերություն կարող է կառավարել այս «միջանցքը» (չակերտները իմն են) 100 տարի։ Միևնույն ժամանակ, Ռուսաստանը և Իրանը նույնպես մտահոգություն են հայտնել այս «միջանցքի» (չակերտները իմն են) կապակցությամբ։ Որոշ հաղորդագրություններում նշվում է, որ նրանք ցանկանում են այս «միջանցքը» (չակերտները իմն են) պահել իրենց վերահսկողության ներքո։ Եվ իմ հարցն է՝ ի՞նչ է ԱՄՆ-ի դիրքորոշումը «Զանգեզուրի միջանցքի» (չակերտները իմն են) վերաբերյալ։ Քանի որ այս «միջանցքը» (չակերտները իմն են) կկապի Հայաստանը և Ադրբեջանը ցամաքային ճանապարհով, և այն ոչ միայն կնպաստի երկու երկրների զարգացմանը, այլև կփոխի․․․

ՏԻԿԻՆ ԲՐՅՈՒՍ․ Այո։

ՀԱՐՑ․ – Հարավային Կովկասի աշխարհաքաղաքական լանդշաֆտը։ Արդյոք Միացյալ Նահանգները աջակցու՞մ է այս նախագծին։

ԲՐՅՈՒՍ․ Միգուցե սա… այո, եկեք… կարծում եմ, այստեղ ունենք ընդհանուր պատկերացում, և սա, իհարկե, երբեմն խնդիր է՝ գտնվել աշխարհաքաղաքականապես այնպիսի վայրում, որը շատ երկրների հետաքրքրության կենտրոնում է։ Մենք գիտենք․․․ և այն, ինչ կարող եմ ասել, միգուցե ճշգրտորեն այն չէ, ինչ դուք փնտրում եք, բայց․․․սա նաև մի հարց է, որը պատասխանի կարիք ունի Սպիտակ տան, նախագահի թիմի կողմից՝ և մենք կցանկանայինք ճշտել նրանց դիրքորոշումը։ Բայց կարող եմ պարզապես ասել, որ Միացյալ Նահանգները, ինչպես գիտեք, աջակցում է խաղաղության և կայունության հաստատմանը Հարավային Կովկասում։ Մենք հետևում ենք տեղի ունեցող իրադարձություններին։ Սա մի բան է, որին մենք անպայման ուշադրություն ենք դարձնում։ Բայց ես կցանկանայի ձեզ համար ավելի կոնկրետ պատասխան ապահովել, և դա, անշուշտ, կանենք։

ԱՄՆ պետքարտուղարության խոսնակը չի կիրառում «միջանցք» տերմինը, իմ տպավորությամբ անգամ շփոթվում է հարցից, ունի մոտավոր պատկերացումներ քննարկումների և առաջարկների մասին, դրա համար խոստանում է մանրամասն ու կոնկրետ պատասխանել։ Իսկ ադրբեջանցու հարցը դա մղվող նարատիվների պատերազմի մաս է։ Այն պատերազմի, որտեղ մեր երկրի ղեկավարությունը ասում է՝ մենք ինչ էլ անենք, իրենք «միջանցք» են ասելու։ ՈՉ, չեն ասելու, եթե դուք աշխատել իմանաք, ուղղակի դուք չգիտեք, թե պետական շահը որն է, աշխատելը որն է, համառելը որն է, դրա համար ով ինչ ուզում անում է ու մեր երկրի տարածքը իր սրտի ուզածով կոչում է․․․ Դա ոչ թե իրենց ուժի, այլ ձեր թուլության և հանձնվելու քաղաքականության հետևանք է»։

–00—ՅՄ