ԵՐԵՎԱՆ, ԱՊՐԻԼԻ 17, 24News

Հայաստանի գործող փոխչեմպիոն «Նոան» հայտարարություն է տարածել «Վանի» հետ կայացած Հայաստանի գավաթի խաղարկության կիսաեզրափակչի առաջին խաղի վերաբերյալ (2։0)։

«Հայաստանի Գավաթի խաղարկության կիսաեզրափակչի ընթացքում երեկ «Վան» ֆուտբոլային ակումբի մարզչական շտաբը դրսևորել է ոչ սպորտային վարքագիծ՝ օգտագործելով անպարկեշտ արտահայտություններ, իսկ մամլո ասուլիսի ժամանակ թույլ տվել «լկտի պահվածք» արտահայտությունը։

Կարծում ենք, որ պայքարը պետք է լինի խաղադաշտում:

Հասունության կոչ ենք անում «Վանի» մարզչական կազմին և հորդորում հապշտապ ենթադրություններից առաջ համոզվել, որ օտարազգի գործընկերներին ճիշտ են հասկացել:

Լիահույս ենք, որ խաղի պատվիրակն ու տեսուչը արձանագրել են բոլոր անպարկեշտ արտահայտություններն ու ոչ սպորտային դրսևորումները»,- ասված է ակումբի տարածած հայտարարությունում։

Նշենք, որ խաղից հետո «Վանի» գլխավոր մարզիչ Վահե Գևորգյանը, հետխաղային մամուլի ասուլիսում պատասխան խաղից առաջ թիմերի շանսերի վերաբերյալ հարցին պատասխանել է հետևյալ կերպ․

«Թեժ հանդիպում եմ խոստանում «Նոային»՝ ի դեմս իրենց գլխավոր մարզչի և մարզչական շտաբի՝ ֆուտբոլային դաշտում, այլ ոչ թե իրենց նման լկտի պահվածքով»,- ասել է Գևորգյանը։

–00–ԱՀ