ԵՐԵՎԱՆ, ԱՊՐԻԼԻ 1, 24News
Իրանի արտգործնախարարության խոսնակ Նասեր Քանանին, արձագանքելով Իրանի դեմ միասնական ճակատ ստեղծելու վերաբերյալ Իսրայելի արտգործնախարարի հայտարարություններին, Ադրբեջանին հորդորել է գիտակցել իսրայելական ռեժիմի իրական մտադրությունները, գրում է Mehr-ը։
Թեմայի առնչությամբ Քանանին գրառում է արել Twitter-ի միկրոբլոգում:
«Մենք խնդրեցինք Ադրբեջանի կառավարությանը բացատրել Սիոնիստական ռեժիմի արտգործնախարարի հայտարարությունները՝ կապված Ադրբեջանի հետ Իրանի դեմ միասնական ճակատ ստեղծելու համաձայնագրի հետ։ Ադրբեջանի արտաքին գործերի նախարարության մամուլի քարտուղարը փորձել է չպատասխանել, փոխարենը նոր մեղադրանքներ է ներկայացրել Իրանի հասցեին»,- ասել է նա։
«Արդյոք լռության շարունակությունը անուղղակի հավանությո՞ւն չէ ռազմավարական գործընկեր Բաքվի (Իսրայել) հայտարարություններին»,- հավելել է Իրանի ԱԳՆ ներկայացուցիչը, ապա հավելել. «Մոտենալով մուսուլմանական երկրներին՝ հանցավոր սիոնիստական ռեժիմը ձգտում է վեճեր և պառակտումներ ստեղծել իսլամական ումմայի մեջ իր էքսպանսիոնիստական նպատակներին հասնելու համար:
Ադրբեջանում մուսուլման եղբայրներին ու քույրերին խորհուրդ ենք տալիս տեղյակ լինել սիոնիստ թշնամու իրական մտադրություններին»,- եզրափակել է իրանցի դիվանագետը։
Թեհրանը նաև բողոքի նոտա է հանձնել Բաքվին ադրբեջանական որոշ լրատվամիջոցների վիրավորական գործողությունների առնչությամբ՝ զգուշացնելով, որ ԶԼՄ-ների նման պահվածքը կարող է բացասաբար ազդել երկու երկրների հարաբերությունների վրա։
Ավելի վաղ Թել Ավիվում Ադրբեջանի արտգործնախարար Ջեյհուն Բայրամովի հետ համատեղ մամուլի ասուլիսի ժամանակ Իսրայելի արտգործնախարար Էլի Քոհենն ասել է հետևյալը. «Իրանը սպառնում է մեր տարածաշրջանին և անկայունություն է ստեղծում Մերձավոր Արևելքում՝ աջակցելով և ֆինանսավորելով ահաբեկչությունը։ Մենք պետք է միասին գործենք Իրանի դեմ միասին. Մենք չպետք է թույլ տանք Իրանին ընդլայնել իր միջուկային կարողությունները»:
--00—ԼՄ