ԵՐԵՎԱՆ, ՀՈՒՆՎԱՐԻ 31, 24News
Պարզ է՝ թեման շատ զգայուն է, այդ խնդիրը կա, բայց ես չեմ որոշել Սփյուռքի նախարարությունը փակել, այժմ ունենք այն, ինչ ունենք։ Այս մասին 24TV-ի հաղորդման ժամանակ նշեց Սփյուռքի գործերի գլխավոր հանձնակատար Զարեհ Սինանյանը:
«Մենք այժմ ունենք 5-6 խոշոր ծրագիր, նախարարությունից միայն մեկն ենք ժառանգել՝ «Արի տուն» ամառային ճամբարը: Մենք սփյուռքից ողորմություն չենք խնդրում, ինչպես արվել է տասնամյակներ շարունակ, մենք չենք ասում՝ փող բերեք կամ նվիրատվություն արեք, մենք միտված ենք նրան, որ ներդրումներ բերեն, ուզում ենք, որ իրենք իմանան՝ կարող են շոշափելի շահ ունենալ:
Իհարկե, ներդրողները տարբեր խնդիրների հետ են առնչվում, իրատեսական չէ ակնկալել, որ սովետական անցյալ ունեցող, 30 տարի կոռուպցիայի ավանդույթների մեջ ճահճացած երկրում մեկ-երկու տարում հնարավոր է ավանդույթը արմատախիլ անել»,- ավելացրեց Սինանյանը:
Հարցին, թե Հայ դատի գրասենյակի հետ որքանո՞վ է աշխատանքը հաջողվում, տպավորություն է, որ Հայոց ցեղասպանության ճանաչման խնդիրը դարձել է միայն Սփյուռքի պատասխանատվությունը, Սինանյանը պատասխանեց, որ եթե բարոյական հաղթանակ ենք ուզեցել տանել, ապա ԱՄՆ-ում ու Ֆրանսիայում շռնդալից հաղթանակ ենք տարել, բայց շոշափելի հաղթանակ չենք ունեցել, համար մեկ խնդիրը պետք է լիներ Թուրքիային ստիպել, որ ճանաչի Հայոց ցեղասպանությունը:
«2023 թվականն է, և մենք կրկին ցեղասպանության վտանգի առջև ենք կանգնած: Պետք է ուսումնասիրենք ու հասկանանք, թե ի՞նչ են մեզ տվել ցեղասպանության ճանաչմանն ուղված քայլերը, եթե դա չենք անում, անպատասխանատու ենք մոտենում, պետք է մտածել՝ ինչպես կապել ցեղասպանության ճանաչման հարցն այսօրվա անվտանգային խնդիրներ հետ: Եթե նպատակը բարոյական հաղթանակն է, դա արդեն ունենք»:
Խոսելով Հայ դատի հետ առկա խնդիրների մասին՝ Սինանյանը նշեց, որ Հայ դատի հետ ֆունդամենտալ խնդիրներ կան, քանի որ այն ՀՅԴ-ի օրգանն է և պետության հետ լուրջ հարցեր ունի:
«Մենք աշխատում ենք Ամերիկայի Հայ դատի արևմտյան ափի հետ, բայց վաշինգտոնյան գրասենյակի հետ դժվար է աշխատել, նախագահն ամիսներ շարունակ սոցիալական մեդիայով հակապետական գրառումներ է անում: Պետք է քաղաքական հասունություն ցուցաբերեն, հասկանան՝ եթե պետություն չունենանք, Հայ դատը չի գոյատևի»,- ավելացրեց Սփյուռքի հանձնակատարը:
Անդրադառնալով ՀՅԴ որոշ անդամների՝ Հայաստան մուտքի արգելքին՝ Զարեհ Սինանյանը նշեց, որ ինքն այդ որոշմանը չի մասնակցել, սուտ են այն պնդումները, թե ինքն է վարչապետին ասել, որ նրանց մուտքը ՀՀ արգելվի. «Այս հարցի հետ կապված վարչապետին իմ կարծիքը հայտնել եմ, բայց իմ կարծիքը հաղթող կողմ չի եղել, սակայն հասկանալի է նրանց մուտքն արգելելու որոշումը, ինչք՞ան կարելի է սաբոտաժը հանդուրժել»:
Մանրամասները՝ տեսանյութում:
Հերմինե Միքայելյան
--00—ԱՊ