Ֆրանսիայում առաջին անգամ շուրջ 180 հազար COVID-19-ով վարակվածներ են գրանցվել մեկ օրում

ԵՐԵՎԱՆ ԴԵԿՏԵՄԲԵՐԻ 29,  24 News

ֆրանսիա

Ֆրանսիայի հանրային առողջապահության ազգային գործակալությունը դեկտեմբերի 28-ի երեկոյան հայտարարել է, որ վերջին 24 ժամում երկրում COVID-19-ով վարակվել Է 179 հազար 807 մարդ, տեղեկացնում Է «Արմենպրես»-ը:

Սա բացարձակ ռեկորդ է այն արդյունքների թվում, որոնք մեկ օրում գրանցվել են համավարակի սկզբից ի վեր: BFMTV հեռուստաալիքն այդ թվերի կապակցությամբ հիշեցրել է, որ առողջապահության նախարար Օլիվիե Վերանն անցած շաբաթ հայտարարել է, որ կորոնավիրուսով ամենօրյա վարակումների քանակությունը երկրում 100 հազարի կհասնի Սուրբծննդյան եւ ամանորյա տոների վերջին:

Սակայն վերջին թվերը շատ ավելի են գերազանցում այդ կանխատեսումը, եւ արդեն անցած շաբաթ մեկ օրում գրանցվել է կորոնավիրուսային ինֆեկցիայով վարակման ավելի քան 104 հազար դեպք: ԶԼՄ-ները ներկայացնում են պաշտոնական տվյալներ, որոնց համաձայն կորոնավիրուսը, ամենից առաջ, խոցում է չպատվաստված բնակչությանը:

Վիճակագրությունը ցույց է տալիս, որ 12 տարեկանից բարձր տարիքի 5,3 միլիոն անձինք դեռ չեն ստացել պատվաստանյութի ոչ մի չափաբաժին, այդ թվում՝ մեկ միլիոնից ավելին 65-ից բարձր տարիքի մարդիկ են: Միեւնույն ժամանակ նշվում է, որ հաջողությամբ է ընթանում լրացուցիչ, բուստերային ներարկումների արշավը: Ավելի քան 23 միլիոն ֆրանսիացիներ ստացել են պատվաստման երրորդ չափաբաժինը, ինչը նշանակում է այն անձանց 88 տոկոսի ընդգրկվածություն, որոնք երկրորդ ներարկումն ստացել են յոթ ամիս առաջ։

  --00—ՄՀ