Ադրբեջանցիների հետ «համակեցությունից» խոսողներն ուղղակի կողմ են արցախահայության բնաջնջմանը

ԵՐԵՎԱՆ, ԴԵՄՏԵՄԲԵՐԻ 3, 24News

տաթևիկ հայրապետյան

ԱԺ նախկին պատգամավոր Տաթևիկ Հայրապետյանը ֆեյսբուքյան իր էջում գրել է. ««Այսօր ժամը 13։00-ի սահմաններում Ադրբեջանի զինվորականները մուտք են գործել ԱՀ Մարտունու շրջանի Ճարտար քաղաքի վարչական տարածքի հարևանությամբ տեղակայված չեզոք գոտի և բռնություն գործադրել նույն քաղաքի բնակիչ, ԱՀ քաղաքացի, անասնապահությամբ զբաղվող, 1956թ. ծնված Սեյրան Սարգսյանի նկատմամբ, որից հետո նրան տեղափոխել են ադրբեջանական հենակետ, որտեղ Ս. Սարգսյանին դիտավորությամբ ապօրինաբար կյանքից զրկել են»,- հաղորդում է Արցախի ԱԱԾ–ն:

Սա Ադրբեջանի կողմից պետական մակարդակով իրականացվող բնաջնջման ու հայատյացության քաղաքականության հետևանք է: Արդեն երրորդ քաղաքացիական անձն է սպանվում Արցախում հրադադարի հաստատումից ի վեր:

Ալիևը միջազգային հանրության համար կշարունակի «խաղաղության» իր կեղծ քարոզը, իսկ Ադրբեջանի ներսում հայ ժողովրդի նկատմամբ կքարոզի ատելություն, թշնամանք և կիրականացնի ահաբեկչական քաղաքականություն: Դրան համարժեք պատրաստվելու համար պետք է համառ դիվանագիտական աշխատանք տանել, զինվել, ուժեղանալ և ոչ թե «դանթել» թվացյալ խաղաղության մեջ, իսկ հետո իրավիճակից դուրս գալու համար այլ մեղավորներ փնտրել:

Այսքանից հետո մեզ մոտ կգտնվեն մարդիկ, որ կխոսեն ադրբեջանցիների հետ «համակեցությունից», այդ մարդիկ ուղղակի կողմ են արցախահայության բնաջնջմանը, այլ բնութագրում ես չունեմ նման քարոզ իրականացնողների վերաբերյալ»:

--00--ԱՀ