Տիկին Ավանեսյան եթե վիրավորվել եք խոսքերիցս, ներողություն եմ խնդրում․ Վարդևանյան

ԵՐԵՎԱՆ ՀՈԿՏԵՄԲԵՐԻ 28,  24 News

կոլաժ

«Հայաստան» խմբակցության պատգամավոր Արամ Վարդևանյանը ներողություն է խնդրել առողջապահության նախարար Անահիտ Ավանեսյանից։ Այս մասին ֆեյսբուքյան էջում գրել է պատգամավորը։ 

«Երեկ ԱԺ-ում ճեպազրույցի ընթացքում բառացի ասել էի «Սա ոչ միայն մասնագիտական տեսանկյունից է խայտառակություն, այլև լկտի վարքագիծ է կարգավիճակի և պաշտոնի նկատմամբ։ Մեկ ամիս է՝ Առողջապահության նախարարը չի ցանկանում արձագանքել իր անմիջական պարտականության կատարմանը։ Սա նաև մարդկայնորեն է ինձ համար անհասկանալի։»: Անձնական վիրավորական որևէ ձևակերպում բնական է, որ առկա չէ, դա իմ ոճը չէ: Սակայն տեղեկացա, որ տիկին Ավանեսյանը վիրավորվել է այդ արտահայտությունից:

Որևէ խնդիր կամ դժվարություն չունեմ կնոջից ներողություն խնդրելու: Դաստիարակությունս թույլ չի էլ տալիս այլ վարքագիծ: Ուղիղ դիմեմ. տիկին Ավանեսյան եթե վիրավորվել եք խոսքերիցս, ներողություն եմ խնդրում, դա առհասարակ կնամեծարության պահանջ է: Միաժամանակ մի շարք անհամաձայնություններս ու քննադատությունս չեն սահմանափակվելու»:

Նշենք, որ Ավանեսյանը Կառավարության այսօրվա նիստից հետո ասել էր, որ  պատգամավոր Արամ Վարդևանյանը իր հասցեին անվայել արտահայտություններ է թույլ տվել, ինքը բոլոր իրավական գործիքները կիրառելու է, պահանջելու է, որ Վարդևանյանը ներողություն խնդրի:

--00—ՄՀ