Երեխաների աչքի առաջ նրանց հոր նկատմամբ բռնություն գործադրելու փաստով պետք է դիմել ՄԻԵԴ

ԵՐԵՎԱՆ, ՀՈԿՏԵՄԲԵՐԻ 14, 24News

Հասարակական

Երեխաների աչք առաջ ոստիկանների կողմից նրանց հոր նկատմամբ բռնություն գործադրելու փաստով պետք է դիմել ՄԻԵԴ։ Այս մասին ֆեյսբուքյան իր էջում գրել է փաստաբան Երվանդ Վարոսյան։

«Ոստիկանի համազգեստով անձանց կողմից ակնհայտ անհամաչափ ուժի կիրառմամբ ու անմարդկային վերաբերմունք ցուցաբերելով ենթադրյալ վարչական իրավախախտում կատարելու մեջ կասկածվող քաղաքացուն «քաղմաս տանելու» տեսագրությունը բոլորդ եք տեսել։ Տեսել եք նաև, որ այդ ամենն իրականացվում էր ենթադրյալ վարչական իրավախախտում կատարած անձի մանկահասակ երեխաների աչքի առաջ։ Ասեմ իմանաք` այդ ոստիկանները քրեական պատասխանատվությունից խուսափելու են, դա հաստատ է», - գրել է փաստաբանը։

Նա նշել է՝ կհարուցվի քրեական գործ, շատ երկար կքննվի, բոլորը կմոռանան, հետո լռության մեջ գործը կկարճվի։

«Խնդրանքս է քաղաքացու փաստաբաններին` անպայման սպառեք ներպետական ատյաններն ու գանգատ ներկայացրեք Եվրոպական դատարան։ Սա չքննարկվող հաղթող գործ է», - նշել է փաստաբանը։

--00--ԿԿ