«Հայաստան» դաշինքը չորրորդ անգամ կփորձի. «Հրապարակ»

ԵՐԵՎԱՆ, ՍԵՊՏԵՄԲԵՐԻ 21, 24News

Ղազինյան

«Հրապարակ»-ը գրում է.

«Ընդդիմադիր «Հայաստան» խմբակցությունը չորրորդ անգամ կառաջադրի Արթուր Ղազինյանի թեկնածությունն ԱԺ պաշտպանության եւ անվտանգության հանձնաժողովի փոխնախագահի պաշտոնում։ «Այսպես մինչեւ ե՞րբ»,- մեր հարցին ի պատասխան՝ դաշինքից խորհուրդ տվեցին այդ հարցն ուղղել իշխանություններին։

Հիշեցնենք, որ երեք անգամ հանձնաժողովական մեծամասնություն կազմող ՔՊ-ականները մերժել են Ղազինյանի թեկնածությունը, ամեն նիստին տարբեր պատրվակներ են ներկայացնում՝ մե՛կ ֆեյսբուքյան գրառումները, մե՛կ հայտարարագրում ունեցվածքը ոչ ամբողջությամբ ներկայացնելը եւ այլն, իսկ իրական պատճառը, ըստ լուրերի, Նիկոլ Փաշինյանի հաշվեհարդարն է, վերջինս է հրահանգել Ղազինյանին «դախազ» պատժել, քանի որ ԱԺ-ում հայտնի ծեծկռտուքի ժամանակ ընդդիմադիր պատգամավորի նետած շիշը Փաշինյանից մի քանի սանտիմետր հեռու ընկավ։ 

Եվ չնայած ԱԺ կանոնակարգ օրենքը չի սահմանափակում, որ փոխնախագահ չընտրած՝ անցնեն այլ հարցերի քննարկմանը, բայց իշխող «ուսապարկերն» այլ հարցեր չեն ընդգրկում նիստերի օրակարգ, որպեսզի ցույց տան, թե ընդդիմությունն է իրենց պարտադրում, որ ուրիշ այլ օրակարգով չզբաղվեն, այլ քննարկեն Ղազինյանի հարցը»:

--00--ԱԹ