Գորիս-Կապան ճանապարհին ադրբեջանցիները կանգնեցրել ու ստուգել են երեք հայկական բեռնատար

ԵՐԵՎԱՆ, ՍԵՊՏԵՄԲԵՐԻ 15, 24News

Հասարակական

Նախօրեին Գորիս-Կապան ճանապարհին ադրբեջանցիները կանգնեցրել ու ստուգել են երեք հայկական բեռնատար։ Այս մասին «Փաստինֆո»-ին հայտնեց Գորիսի փոխքաղաքապետ Կարեն Քոչարյանը՝ նշելով, որ նման ահազանգ ստացել է վարորդներից։

«Երեկ ինձ Կապանից ասել են, որ հայկական երեք բեռնատար են ստուգել։ Հարյուր տոկոսանոց չէ, բայց տեղեկացրել են վարորդները»։

Հայկական բեռնատարները Գորիսից Կապան էին ուղևորվում։ Քոչարյանը նշեց, որ հայ վարորդներից ադրբեջանցիները գումար չեն պահանջել, թե ինչո՞ւ են կանգնեցրել հայկական բեռնատարները, դեռ պարզ չէ։

Հիշեցնենք, որ սեպտեմբերի 12-ից ադրբեջանցիները Գորիս-Կապան ճանապարհին կանգնեցնում ու ստուգում են իրանական բեռնատարները, գումար գանձում վարորդներից։ Քոչարյանը նշեց, որ անցակետում ստուգումների պատճառով Սյունիքում մեծ հերթեր են գոյացել։ Հավելեց, որ տեղյակ չէ՝ ճանապարհին ստեղծված իրավիճակը հանգուցալուծելու ուղղությամբ բանակցություններ վարվում են, թե ոչ։

Նախօրեին նաև տեղեկացրել էինք, որ ադրբեջանցիները ՀՀ տարածքում Իրանից Հայաստան եկող ավտուբուս են կանգնեցրել։ Ադրբեջանական կողմը պնդում է՝ իր տարածքն է, իսկ հայկական կողմը դրան չի հակազդում։

--00--ԿԿ