«Աղբ մի՛ նետեք լիճը»․ «Սևան» ազգային պարկի աշխատակիցները մաքրել են Լճաշենի առափնյա տարածքը

ԵՐԵՎԱՆ, ՍԵՊՏԵՄԲԵՐԻ 1, 24News

նկար

«Սևան» ազգային պարկ» ՊՈԱԿ-ի աշխատակիցները հատուկ տեխնիկայի միջոցով մաքրել են Լճաշեն համայնքին հարակից առափնյա տարածքը: Շրջակա միջավայրի նախարարությունը հորդորում է աղբ չնետել լիճը: 

«Սիրելի՛ հայրենակիցներ, հորդորում ենք հոգատար լինել մեզ շրջապատող միջավայրի նկատմամբ:

Ձեր կազմակերպած խնջույքներից և հանգստից հետո մաքրե´ք և հավաքե´ք աղբը, մի՛ նետեք լիճը կամ թողեք ափին։

Աղբահանության ոչ ճիշտ կազմակերպման հետևանքով այն ջուրը, որ խմում ենք, այն օդը, որ շնչում ենք, այն սնունդը, որ ուտում ենք, կարող են պարունակել շատ վնասակար նյութեր: Թունավոր թափոնները կարող են լուրջ և մահաբեր առողջական խնդիրների պատճառ հանդիսանալ:

Որքան էլ որ համապատասխան մարմինները զբաղվեն աղբահանության և շրջակա միջավայրի մաքրության պահպանության հարցով, արդյունքը նկատելի չի լինի, քանի դեռ մենք ինքներս չենք սկսել մտահոգվել մեր շրջակայքի մաքրության խնդրով»,- նշված է ՀՀ շրջակա միջավայրի նախարարության տարածած հաղորդագրության մեջ:

ՀՀ բնության հատուկ պահպանվող տարածքներում աղբահանության պատշաճ կազմակերպմանը նպաստելու և գետերի հուներն ու անտառածածկ տարածքներն աղբի չնախատեսված կուտակումից զերծ պահելու նպատակով, շրջակա միջավայրի նախարար Ռոմանոս Պետրոսյանի հանձնարարականով բնության հատուկ պահպանվող տարածքներում ու հարակից համայնքներում կտեղադրվեն լրացուցիչ աղբամաններ»,- ասված է նախարարության Ֆեյսբուքի գրառման մեջ:

--00—ԼՄ