Չօգնել Արցախին, կնշանակի լքել մարտական դիրքը. Հիմնադրամի հավատարիմ նվիրատուն Արցախում է

ԵՐԵՎԱՆ, ՀՈՒՆԻՍԻ 23, 24News

Քիրաջյան

«Հայաստան» համահայկական հիմնադրամի հավատարիմ նվիրատուներից ամերիկաբնակ Լևոն Քիրաջյանն այցելել է Արցախ: Այս մասին հայտնում է «Արցախպրես»-ը: Արդեն մոտ երեք տասնամյակ է, ինչ Քիրաջյանն առանց դադարի ամեն ամիս իր լուման է ներդնում Հայաստանի ու Արցախի բարգավաճման գործում:

«Երբ սկսվեց 1990-ական թթ. պատերազմը, աշխարհի հայերը պարտավոր էին ինչ-որ չափով օգնություն տրամադրել Արցախին, և հենց այդ ժամանակ էլ սկսեցի ցուցաբերել իմ աջակցությունը՝ գումարի տեսքով, և մինչ օրս էլ շարունակում եմ այդ գործունեությունը: Ես ամեն ամիս 420 դոլլար վճարում եմ, որպեսզի կարողանամ իմ ներդրումն ունենալ հայրենիքի շենացման կարևոր գործում: Չօգնել Արցախին, կնշանակի լքել մարտական դիրքը»,- կայքի հետ զրույցում նշել է Լ. Քիրաջյանը՝ տեղեկացնելով, որ մինչ գալը վճարել է հուլիս ամսվա գումարը, որպեսզի հանգիստ այցելի Արցախ:

Քիրաջյանն իր կյանքի կարևոր դրվագներից է համարում Արցախ կատարած այցելությունները, առանց որոնց նա չի կարող ապրել խաղաղ հոգով:

«Արցախ այցելում եմ կարոտս առնելու համար: Նախորդ այցելություններիս ժամանակ լինում էի դիրքերում՝ զինվորներին իմ օգնությունը ցուցաբերելու: Հետևում էի տարբեր շինաշխատանքների ընթացքին, քննարկում էինք առաջիկայում իրագործվելիք ծրագրերը»,- ընդգծել է բարերարը:

Զրույցի վերջում նվիրյալ հայը Արցախի սրտից կոչ է ուղղել համայն հայությանը՝ այս դժվար ժամանակաշրջանում ամեն մեկը իր ուժերը ներածին չափով կանգնի Արցախի կողքին,և հավատացրեց, որ այդ դեպքում «ամեն բան լավ է լինելու»։

--00--ԱԹ

Տեսանյութեր

Live

Լրահոս