ԵՐԵՎԱՆ, ՓԵՏՐՎԱՐԻ 9, 24News
Ոստիկանության Կենտրոնական բաժնի քրեական հետախույզները ստացած օպերատիվ տվյալներն իրացրին փետրվարի 6-ի երեկոյան: Ինչպես հայտնում են ՀՀ ոստիկանությունից, ժամը 18.50-ին մայրաքաղաքի Անդրանիկ Իոսիֆյան փողոցից, ապօրինի թմրամիջոց պահելու և օգտագործելու կասկածանքով, բերման ենթարկվեց նույն փողոցի բնակիչ 37-ամյա մի տղամարդ` իր «Մերսեդեսով» հանդերձ: Նրա մոտից հայտնաբերվեց «Լիրիկա» հոգեներգործուն դեղահաբ և պլաստիկ տարա` «մետամֆետամին» տեսակի թմրանմիջոցի նմանվող սպիտակ, բյուրեղանման զանգվածով:
Նշանակվեցին տոքսիկոքիմիական և դատաքիմիական փորձաքննություններ, տղամարդը ձերբակալվեց:
Դեպքի առթիվ հարուցված քրեական գործի շրջանակներում, դատարանի որոշմամբ, նաև խուզարկություն կատարվեց ձերբակալվածի բնակության վայրում: Հայտնաբերվեցին օդամղիչ ատրճանակի գազաբալոններ ու «Մակարով» ատրճանակի փամփուշտներ: Նշանակվել է դատաձգաբանական փորձաքննություն:
Նախաքննությունը շարունակվում է:
--00--ԱԹ