ԵՐԵՎԱՆ, ԴԵԿՏԵՄԲԵՐԻ 8, 24News
Հայրենիքի փրկության շարժումը հայտարարություն է տարածել՝ դիմելով ոստիկաններին:
Շարժման անդամներն ակնկալում են, որ ՀՀ ոստիկանությունը, հավատարիմ մնալով ՀՀ Սահմանադրությամբ և օրենքներով սահմանված օրինականության սկզբունքին, չի խոչընդոտի միջոցառումների իրականացմանը և առաջնորդվելով «Հավաքների ազատության մասին» ՀՀ օրենքի 32-րդ հոդվածի 2-րդ մասի երկրորդ նախադասությամբ` իր իրավասությունների սահմաններում կաջակցի հավաքին: Հայրենիքի փրկության շարժումից հայտնում են նաև, որ ցանկացած ապօրինության պատասխանատվություն կրելու է բացառապես իշխանությունը:
«Հարգարժա՛ն ՀՀ ոստիկաններ,
Հայրենիքի փրկության շարժումը ՀՀ վարչապետի պաշտոնը զբաղեցնող անձին տվել էր ժամանակ մինչև այսօր 12:00-ն իր հրաժարականը ներկայացնելու համար:
Վարչապետի պաշտոնը զբաղեցնող անձի կողմից հրաժարական չներկայացնելով պայմանավորված՝ հնարավոր են ինչպես ինքնաբուխ, այնպես էլ տարբեր քաղաքացիական նախաձեռնությունների կողմից շտապ հավաքների անցկացում և իրականացում:
Ակնկալում ենք, որ ՀՀ ոստիկանությունը, հավատարիմ մնալով ՀՀ Սահմանադրությամբ և օրենքներով սահմանված օրինականության սկզբունքին, չի խոչընդոտի այդ միջոցառումների իրականացմանը և առաջնորդվելով «Հավաքների ազատության մասին» ՀՀ օրենքի 32-րդ հոդվածի 2-րդ մասի երկրորդ նախադասությամբ` իր իրավասությունների սահմաններում կաջակցի հավաքին:
Հարկ ենք համարում հիշեցնել նաև, որ Հայրենիքի փրկության շարժման իրավական հանձնախմբի՝ հավաքների մասնակիցների իրավական աջակցման և օգնության տրամադրման թեժ գծի հեռախոսահամարը` 043 20 05 97, որը շարունակում է գործել 24 ժամ:
Ոստիկանության ուշադրությունն ենք հրավիրում մամուլում շրջանառվող այն տեղեկությունների վրա, որ իշխող քաղաքական ուժի որոշ ներկայացուցիչներ պատրաստվում են կազմակերպել սադրանքներ և կանխամտածված քաղաքացիական բախումներ, ինչի առնչությամբ հայտնում ենք, որ ցանկացած ապօրինության պատասխանատվություն կրելու է բացառապես իշխանությունը:
Իրավական պետությունն այլընտրանք չունի», - ասված է հայտարարությունում։
--00—ՄՀ