ԵՐԵՎԱՆ, ՆՈՅԵՄԲԵՐԻ 30, 24News
Եվրասիական զարգացման բանկի թվային նախաձեռնությունների հիմնադրամի կազմակերպած` Եվրասիական տարածքում Covid-19 կորոնավիրուսային վարակի համաճարակի տարածման կանխարգելմանը և բացասական հետևանքների հաղթահարմանն ուղղված թվային լավագույն լուծումների մրցույթի արդյունքներն արդեն հայտնի են։
ԵԱԶԲ վարչության նախագահի տեղակալ, ՀՀ նախկին վարչապետ Տիգրան Սարգսյանը, «Սպուտնիկի» տաղավարումՄոսկվա-Երևան-Մինսկ-Նուր-Սուլթան տեսակամրջի ընթացքում ներկայացնելով ամփոփումը, նշել է, որ ստացվել է ընդհանուր 163 դիմում՝ ԵԱՏՄ անդամ պետությունների տարբեր ընկերություններից: Այսպես, 12 դիմում ստացվել է Հայաստանից, 17 դիմում՝ Բելառուսից, 58 դիմում՝ Ղազախստանից, 27 դիմում՝ Ղրղզստանից, 14 դիմում՝ Տաջիկստանից, 35 դիմում՝ Ռուսաստանից: Գնահատման համար հատուկ ստեղծվել էր փորձագետների խումբ, ընտրվել են եզրափակիչի 16 մասնակիցներ, որոնց հետ լրացուցիչ խորհրդատվություն է անցկացվել:
«Մեր ուշադրութանն են ներկայացվել շատ ակտուալ թվային լուծումներ՝ Covid-19 համավարակի մարտահրավերի համար: Դրանք վերաբերվել են, օրինակ, հեռաբժշկությանը, բիզնես գործընթացների՝ օնլայն ռեժիմի անցմանը, հաճախորդների անհպում ծառայության անցմանը և այլն»,- ասաց Տիգրան Սարգսյանը՝ հավելելով, որ հաղթողին ընտրելը հեշտ չի եղել:
Արդյունքում ընտրվել է 4 հաղթող: Առաջին հաղթող ծրագիրն է «Be to be cloud»-ը, Smart Staffing ընկերություն՝ Ռուսաստանից: Երկրորդը ծրագիրն է՝ «Forum Viar»-ը, Tentek ընկերություն`Ղազախստանից: Երրորդ հաղթող ծրագիրն է «Online doctor»-ը, Мобильные Медицинские Технологии ընկերություն՝ Ռուսաստանից: Չորրորդ ծրագիրն է «Online event space»-ը, PluseTDE ընկերություն՝ Բելառուսից:
Սարգսյանը շնորհակալություն հայտնեց բոլոր մասնակիցներին՝ իրենց գաղափարների համար:
Մրցանակների հանձնման արարողությունը տեղի կունենա Առաջին եվրասիական hամագումարի շրջանակում, որը նախատեսվում է դեկտեմբերի 4-ին Մոսկվայում:
--0--ԿԿ