Ռուսաստանը դեմ է Լեռնային Ղարաբաղում ռազմական լուծմանը. Լավրով

ԵՐԵՎԱՆ,  ՀՈԿՏԵՄԲԵՐԻ 26 24News  

Լավրով

Մոսկվան դեմ է Լեռնային Ղարաբաղում տիրող իրավիճակի ռազմական լուծմանը և կոչ է անում բոլոր արտաքին խաղացողներին զերծ մնալ ռազմական սցենարից։ Այս մասին РИА Новости-ի հաղորդմամբ՝ հայտարարել է ՌԴ ԱԳ նախարար Սերգեյ Լավրովը:

«Չենք թաքցնում, որ չենք սատարում դիրքորոշմանն այս խնդրի ռազմական լուծման հնարավորության և ընդունելիության վերաբերյալ: Երկու ժողովուրդներին՝ հայերին և ադրբեջանցիներին, համարելով բարեկամ և եղբայրական, մենք չենք կարող կիսել նման նկրտումները», - հայտնել է Լավրովը «Աթենքին և Մակեդոնիայի լրատվական գործակալությանը» տված հարցազրույցում:

Նա հիշեցրել է՝ Ռուսաստանի, ԱՄՆ-ի և Ֆրանսիայի նախագահները, որպես ԵԱՀԿ Մինսկի խմբի ղեկավարներ, հստակ արտահայտվել են «բացառապես քաղաքական» կարգավորման օգտին:

«Կոչ ենք անում բոլոր արտաքին «խաղացողներին» անել ամեն ինչ ռազմական սցենարը բացառելու համար, կողմերի հույզերը սառեցնելու, ակտիվացնելու խաղաղության գործընթացը վերսկսելու պայմաններ ստեղծելու համար աշխատանքը », - ամփոփել է Լավրովը:

 

Սեպտեմբերի 27-ի վաղ առավոտյան ադրբեջանական կողմը՝ խախտելով բոլոր հնարավոր միջազգային պայմանավորվածությունները, թուրքական բանակի գործուն աջակցությամբ անցել է հարձակման Արցախի հետ շփման գծի ամբողջ երկայնքով՝ կիրառելով իր ձեռքի տակ եղած սպառազինության բոլոր տեսակները՝ այդ թվում և օդուժ։ Ադրբեջանական բանակը գնդակոծել է նաև Հայաստանի Հանրապետության պետական սահմանը։

Հայկական զինուժը համառ մարտերից հետո կարողացել է ձախողել հակառակորդի հիմնական նպատակները ու շարունակում է զարգացնել հաջողությունները՝ թշնամուն հետ շպրտելու համար։

Ադրբեջանական ԶՈւ շարքերում ներառված են նաև վարձկաններ Սիրիայից ու Լիբիայից, որոնք այստեղ են հայտնվել Թուրքիայի միջնորդությամբ:

Հոկտեմբերի 10-ին Մոսկվայում ՌԴ, ՀՀ և Ադրբեջանի ԱԳ նախարարների եռակողմ հանդիպման ժամանակ հրադադարի մասին պայմանավորվածություն է ձեռք բերվել, որը, սակայն, Ադրբեջանը չի պահել: Նույն կերպ Ադրբեջանը խախտել է նաև հոկտեմբերի 17-ին Ֆրանսիայի միջնորդությամբ ձեռք բերված հրադադարի մասին պայմանավորվածությունը:

Մինչև հոկտեմբերի 16-ը ներառյալ Ադրբեջանի կողմից քաղաքացիական բնակավայրերի թիրախավորման արդյունքում սպանվել է ընդհանուր 36 խաղաղ բնակիչ, որից 1 մանկահասակ աղջիկ, 7 կին և 28 տղամարդ: Մարմնական վնասվածքներ է ստացել ընդհանուր առմամբ 115 մարդ, որից 95 անձ ստացել է լուրջ վնասվածքներ: Վերջիններից 77-ը արական, իսկ 18-ը` իգական սեռի քաղաքացիներ են:

Արցախի Հանրապետության 130 բնակավայրերին հասցվել է նյութական մեծ վնաս, մասնավորապես՝ 7800 մասնավոր անշարժ գույք, 720 մասնավոր շարժական գույք, 1310 ենթակառուցվածքներ, հանրային և արտադրական նշանակության օբյեկտներ:

--00—ՄՀ