ԵՐԵՎԱՆ, ՍԵՊՏԵՄԲԵՐԻ 2, 24News
Այսօր, սեպտեմբերի 2-ին հայտնի է դարձել, որ Վրաստանի խորհրդարանում «Վրացական երազանք» կուսակցության գործող պատգամավոր Հենզել Մկոյանը փաստաթղթեր է ներկայացրել Ախալքալաքի ընտրական հանձնաժողով, իր թեկնածությունն առաջադրելու, որպես պատգամավորի անկախ թեկնածու: JNEWS-ի հետ հեռախոսազրույցում Հենզել Մկոյանը հաստատել է այս տեղեկատվությունը:
«Այո, ճիշտ է առաջադրվել եմ, ավելի ճիշտ պրոցեսի մեջ է: Փաստաթղթերի մեծ մասը ներկայացրել եմ, մնացել է վաղը մի քանի տեղեկանք ներկայացնեմ ու վերջ: Ես դնելու եմ իմ թեկնածությունը, գիտեմ շատ պատասխանատու գործ է, հատկապես, որ ամբողջ Վրաստանում իմ տվյալներով անկախ թեկնածու չկա: Ժողովուրդն այսօր ուզում է, որ ես առաջադրվեմ, ժողովրդի խնդրանքով եմ առաջադրվում, ինչպես նաև ես եմ ուզում, 5 անգամ եղել եմ խորհրդարանի պատգամավոր և ուզում եմ, որ 6-րդ անգամ նորից ընտրվեմ»,- ասել է խորհրդարանում իշխող կուսակցությունը ներկայացնող, Ախալքալաքի և Նինոծմինդայի մեծամասնական պատգամավոր Հենզել Մկոյանը:
Վրաստանում հոկտեմբերի 31-ին կայանալիք խորհրդարանական ընտրություններին «Վրացական երազանք» կուսակցությունը Հենզել Մկոյանի փոխարեն, որպես մեծամասնական պատգամավորի թեկնածու է առաջադրել Սամվել Մանուկյանին:
Հարկ է նշել, որ Հենզել Մկոյանը Վրաստանի խորհրդարանի պատգամավոր է սկսած 1999 թվանակից մինչ օրս:
Նշենք, որ Վրաստանի ընտրական օրենսգրքի 116-րդ հոդվածի, 9-րդ մասի համաձայն. ընտրողների նախաձեռնող խմբի կողմից թեկնածուի առաջադրումը պետք է հաստատվի համապատասխան ընտրատարածքում գրանցված աջակից ընտրողների առնվազն 1 տոկոսի ստորագրությունով: Իսկ եթե անկախ թեկնածուն խորհրդարանի գործող պատգամավոր է, ապա նրա առաջադրման համար ստորագրություն հարկավոր չէ:
--00--ԱԹ