ԵՐԵՎԱՆ, ՕԳՈՍՏՈՍԻ 31, 24News
ՀՀ երրորդ նախագահ Սերժ Սարգսյանի եղբորորդու՝ Նարեկ Սարգսյանի (Ֆրանկլին Գոնսալես) գործով նախաքննությունը շարունակվում է։ Այս մասին hraparak.am-ին հայտնել է նրա պաշտպան Արթուր Պիվազյանը՝ նշելով, որ նախաքննության ավարտին երկար ժամանակ չի մնացել, բայց նախաքննության ավարտի մասին իրենց չեն հայտնել։ Այս փուլում քննչական գործողություններ ընթանում են:
«Եղել են քննչական գործողություններ, վերջին ժամանակներում չկան, չգիտեմ՝ ինչի, գուցե քննիչն այնպիսի քննչական գործողություններ է անում, որոնց մենք չենք մասնակցում»,-ասել է պաշտպանը և տեղեկացրել, որ կալանավորման ժամկետի որոշման վերաբերյալ բողոք են ներկայացրել վերաքննիչ դատարան, սակայն դեռևս հայտնի չէ՝ ում է մակագրվել։
Ինչ վերաբերում է Նարեկ Սարգսյանի առողջական վիճակին, ապա նա մշտապես դեղորայքներ է ընդունում:
«Նա տեղափոխվեց քաղաքացիական հիվանդանոց, ստուգումներ անցավ: Առողջական խնդիրների հետ կապված՝ դիմել ենք վարույթն իրականացնող մարմնին, որպեսզի տեղափոխենք մեկ այլ քաղաքացիական հիվանդանոց՝ ավելի մանրակրկիտ հետազոտություններ անցնելու հետ կապված»,-ասել է պաշտպանը։
Թե ինչ հիվանդանոց են ուզում տեղափոխել, ինչպիսի առողջական խնդիրների մասին է խոսքը, պաշտպանը չի մեկնաբանել։
Նարեկ Սարգսյանը մեղադրվում է ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ (հոգեներգործուն) նյութերի ապօրինի շրջանառությունն իրացնելու, պատրաստելու նպատակով կամ դրանք ապօրինի իրացնելու հատկանիշներով։ Նա 2018 թվականի հուլիսից հետախուզվում էր։ Հայտնաբերվել էր Չեխիայում՝ Ֆրանկլին Գոնսալես անվամբ, 2019-ի դեկտեմբերին արդեն արտահանձնվեց Հայաստանին։
--00—ԼՄ