ԵՐԵՎԱՆ, ՕԳՈՍՏՈՍԻ 29, 24News
«Ժողովուրդ» օրաթերթը գրում է․ ««Ժողովուրդ» օրաթերթի տեղեկություններով՝ ՀՀ վարչապետ Նիկոլ Փաշինյանը պատրաստվում է առաջիկայում պաշտոնական այցով Արցախ մեկնել: Ըստ մեր տեղեկությունների՝ Նիկոլ Փաշինյանը նպատակ ունի հանդիպում ունենալ Արցախի նոր իշխանությունների ներկայացուցիչների հետ:
Հիշեցնենք, որ Փաշինյանը վերջին անգամ Արցախում պաշտոնական այցով եղել է մայիսի 21-ին: Վարչապետը տիկնոջ հետ Ստեփանակերտ էր մեկնել մասնակցելու Արցախի նորընտիր նախագահ Արայիկ Հարությունյանի երդմնակալության արարողությանը: Այդ ժամանակահատվածում կորոնավիրուսի հետ կապված այցը շատ կարճ է եղել, ու քիչ պաշտոնյաներ են վարչապետի հետ Արցախ մեկնել, իսկ այժմ Փաշինյանը նպատակ ունի մի քանի օրով Արցախում լինել:
Նշենք, որ սեպտեմբերի 2-ն Արցախի անկախության օրն է, սպասվում են բազմաթիվ միջոցառումներ, ինչպես նաեւ տեղի կունենա Արցախի նախագահ Արայիկ Հարությունյանի պաշտոնավարման 100 օրվան նվիրված մամուլի ասուլիսը: ՀՀ վարչապետն ու պաշտոնյաները Արցախ կմեկնեն՝ մասնակցելու անկախության օրվան նվիրված միջոցառումներին:
«Ժողովուրդ» օրաթերթը զրուցել է վարչապետի մամուլի խոսնակ Մանե Գեւորգյանի հետ՝ պարզելու համար, թե արդյոք իրական են տեղեկությունները: «Եթե նման այց նախատեսվի, ես կտեղեկացնեմ, ինչպես հարկն է»,-եզրափակեց մամլո խոսնակը»:
Մանրամասները՝ «Ժողովուրդ» օրաթերթի այսօրվա համարում։
--00--ԱՀ