Մհեր Գրիգորյանի և ՄԱԿ-ի համակարգող Շոմբի Շարփի նախագահությամբ տեղի է ունեցել քննարկում

ԵՐԵՎԱՆ, ՀՈՒԼԻՍԻ 24, 24News    

քաղաքական

Փոխվարչապետ Մհեր Գրիգորյանի եւ Հայաստանում ՄԱԿ-ի մշտական համակարգող Շոմբի Շարփի նախագահությամբ Կառավարությունում կայացել է աշխատանքային քննարկում՝ նվիրված ՀՀ-ՄԱԿ առաջիկա Համագործակցության շրջանակի վերաբերյալ առանցքային փաստաթղթերի նախագծերին: Այս մասին տեղեկացնում է ՀՀ Կառավարությունը։

Քննարկմանը մասնակցել են Կառավարության եւ ՄԱԿ-ի գործակալությունների ներկայացուցիչներ, ինչպես նաեւ` առցանց կերպով քննարկմանն են միացել Հայաստանում ՄԱԿ-ի մի շարք գործակալությունների ղեկավարներ:

Օրակարգում էին 2021-2025 թթ․ համար ՄԱԿ-ի կայուն զարգացման Համագործակցության շրջանակի նախագիծը, ինչպես նաեւ՝ ՄԱԿ-ի երեք գործակալությունների՝ ՄԱԿ-ի զարգացման ծրագրի, ՄԱԿ-ի մանկական հիմնադրամի եւ ՄԱԿ-ի բնակչության հիմնադրամի 2021-2025 թթ. համագործակցության ծրագրերի նախագծերը:

Փոխվարչապետ Մհեր Գրիգորյանն իր ողջույնի խոսքում նշել է, որ օրակարգում այն առանցքային փաստաթղթերն են, որոնց շուրջ կշարունակեն զարգանալ ու խորանալ ՀՀ-ՄԱԿ հարաբերությունները:

«Հաշվի առնելով, որ մենք գտնվում ենք ոլորտային ռազմավարությունների եւ 2020-2050թթ. Հայաստանի վերափոխման ռազմավարության մշակման եւ վերանայման փուլում՝ կարեւորում եմ ՄԱԿ-ի հետ համագործակցության փաստաթղթերի եւ մեր ազգային ռազմավարությունների ներդաշնակեցումը՝ կենտրոնանալով Կայուն զարգացման նպատակների 2030թ. օրակարգի վրա:

Ցանկանում եմ նաեւ, օգտվելով առիթից, նշել, որ վերջերս հրապարակվեց ՄԱԿ-ի Կայուն զարգացման նպատակների վերաբերյալ Հայաստանի կամավոր ազգային գնահատման երկրորդ զեկույցը, որն իսկապես կարեւոր է Կառավարության ու մեր միջազգային գործընկերների ներդրված համատեղ ջանքերը գնահատելու եւ առաջիկա անելիքներն ուրվագծելու համար», - նշել է փոխվարչապետը:

Շոմբի Շարփը, ներկայացնելով 2021-2025 թթ․ ՄԱԿ-ի կայուն զարգացման Համագործակցության շրջանակը, նշել է.

«Այսօրվա հանդիպումը կարեւոր հնարավորություն էր՝ ՄԱԿ-ի նոր՝ 2021-2025 Գործընկերության շրջանակի ռազմավարական ուղղությունները Կառավարության հետ համաձայնեցնելու համար։ Գործընկերության շրջանակը ՄԱԿ-ի բոլոր գործակալությունների առաջիկա հինգ տարիների համագործակցության ամբողջական առաջարկն է, որը բխում է Հայաստանի ազգային առաջնահերթություններից եւ կարիքներից:

Մենք կքննարկենք նաեւ ՄԱԿ-ի երեք գործակալությունների համագործակցության նոր ծրագրերը, որոնք, Հայաստանում գործունեություն ծավալող ՄԱԿ-ի բոլոր 12 գործակալությունների հետ համատեղ, կնպաստեն ՄԱԿ-ի Գործընկերության շրջանակի նպատակների իրագործմանը։ Ես վստահ եմ, որ մեր բոլոր գործընկերների հետ միասին մենք կարող ենք Հայաստանում իրագործել 2030 օրակարգը՝ երաշխավորելով էլ ավելի լավ կյանք եւ ապագա բոլորի համար»:

Ամփոփելով քննարկման արդյունքները՝ փոխվարչապետ Մհեր Գրիգորյանը եւ ՄԱԿ-ի մշտական համակարգող Շոմբի Շարփը երկուստեք կարեւորել են նման ձեւաչափով հանդիպումների կազմակերպումը՝ համագործակցությունն առավել արդյունավետ եւ կառուցողական դարձնելու առումով:

--0--ԿԿ