2019-ի հունվար-դեկտեմբերին Արցախ է այցելել 41963 օտարերկրյա զբոսաշրջիկ 93 երկրից

ԵՐԵՎԱՆ, ՀՈւՆԻՍԻ 11, 24News

1

Հունիսի 11-ին Աժ արտաքին հարաբերությունների ու ֆինանսաբյուջետային և տնտեսական կառավարման հարցերի մշտական հանձնաժողովները՝ Վահրամ Բալայանի և Արթուր Հարությունյանի նախագահությամբ հրավիրել են նիստ: Այդ մասին հայտնում է Արցախի Հանրապետության Ազգային ժողովը:

Քննարկվել են արտաքին հարաբերությունների ու զբոսաշրջության ոլորտների, հանրային հեռուստառադիոընկերության գործունեության, «Ազատ Արցախ» թերթի 2019 թ. պետական բյուջեով նախատեսված ծախսերի կատարման տարեկան հաշվետվությունները:

Արտաքին գործերի նախարար Մասիս Մայիլյանը, ներկայացնելով 2019 թ.-ի բյուջետային ծախսերի մասին տեղեկատվությունը, նշել է, որ նախարարության պահպանման համար նախատեսվել է 787 մլն 706 հազ դրամ: Փաստացի ծախսվել է 674 մլն 315 հազ դրամ, որը կազմել է նախատեսվածի 85,6%-ը:

Ռազմահայրենասիրության, երիտասարդության, սպորտի և զբոսաշրջության նորանշանակ նախարար Սամվել Շահրամանյանի լիազորությամբ՝ զբոսաշրջության ոլորտի կատարողականի վերաբերյալ հաշվետվությունը հանձնաժողովի քննարկմանն է ներկայացրել Զբոսաշրջության վարչության պետ Արտակ Գրիգորյանը:

Վերջինիս փոխանցմամբ 2019 թ. հունվար-դեկտեմբեր ամիսներին Արցախի Հանրապետություն է այցելել 41963 օտարերկրյա զբոսաշրջիկ 93 երկրից՝ նախորդ տարվա նույն ցուցանիշը գերազանցելով 46,7 %-ով: Ներկայացնելով զբոսաշրջության զարգացման ծրագիրը՝ ոլորտի պատասխանատուն նշել է, որ նախատեսվել է 25 մլն դրամ, կատարողականը՝ 19 մլն 517 հազ դրամ կամ ծրագրի 78%-ը:

Հանրային հեռուստառադիոընկերության խորհրդի նախագահ Արսեն Առստամյանը, խոսելով խորհրդի 2019թ. ծախսերի մասին, նշել է, որ նախատեսված 27 մլն 958 հազ դրամից փաստացի ծախսվել է 26 մլն 636 հազ դրամը, կատարողականը՝ 95,3%: Խորհրդի նախագահն այնուհետև հանձնաժողովի քննարկմանն է ներկայացրել ընթացիկ ծախսերի կառուցվածքը:

«Ազատ Արցախ» թերթի խմբագիր Նորեկ Գասպարյանի փոխանցմամբ՝ պետական բյուջեից թերթին 2019թ. հատկացված գումարը եղել է անփոփոխ՝ կազմելով 94 մլն 120 հազ դրամ: Վաճառքից և բաժանորդագրությունից ստացված եկամուտները կազմել են 4 մլն 300 հազ դրամ, հայտարարություններից ստացվածը՝ 2 մլն դրամ: Սարքավորումներ գնելու նպատակով թերթը պետբուջեից ստացել է լրացուցիչ ֆինանսավորում:

Պատգամավորները ոլորտների պատասխանատուներին են առաջադրել հարցեր և հանդես եկել առաջարկություններով:

2019թ. պետական բյուջեի կատարման տարեկան հաշվետվությունների քննարկումը կշարունակվի վաղը՝ հունիսի 12-ին ԱԺ արտադրության և արտադրական ենթակառուցվածների հարցերի ու ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստում:

--0—LՄ